Anda di sini

Poliklinik Sarikei bedau mayuh pengurang ari segi perengkaguna

Advertisement

SARIKEI: Kaban Parlimen Sarikei, Andrew Wong Ling Biu madahka servis pengerai kelebih agi di Poliklinik Sarikei mayuh endar pengurang ari segi perengkaguna.

Ku iya, Opis Menteri Pengerai patut ngemeratka pengurang ba Poliklinik Sarikei sereta mutarka penanggul nya enggau naka pengelengkas.

“Dalam Aum Dewan Parlimen tu tadi, kami bisi betanya sentang penanggul tu. Sida madahka Opis Menteri Pengerai benung mutarka penanggul nya nengah chara bererenggat.

“Nitihka penerang ari Menteri Pengerai Malaysia, Datuk Seri Dr. S. Subramaniam ba Aum Dewan Parlimen nya, diatu Kelinik Pengerai Sarikei bisi 7 iku lutur nyengkaum seiku Pakar Pengerai.

“Kelimpah ari nya, bisi 3 iku Pemesai Farmasi, 10 iku  Penulung Pemesai Perubat, 14 iku indu misi ke udah dilatih, 36 iku indu misi mensia mayuh, lapan iku Penulung Pemesai Farmasi, 10 iku juruteknologi Makmal Perubat, dua iku juru x-ray sereta lapan iku pemantu perubat pengerai,” ku Andrew madah ba aum enggau media di Opis Parti Tindakan Demokratik (DAP) Sarikei, kemari.

Enti nitihka penyampau nya ku Andrew, nya nampak endar kurang sereta enda setipak enggau orang ke begunaka servis.

“Pekara nya ngenusahka mensia mayuh ti ngarap nerima servis pengerai ke manah sereta bekualiti.

“Kami arapka Opis Menteri Pengerai jampat agi ngaga perengkaguna pengerai ke baru kena napi penyampau mensia mayuh sereta ngurangka penyekut pesakit ba kelinik ke diatu,” ku Andrew.

Andrew mega arapka Opis Menteri Pengerai muka servis pengerai baka kelinik mindah kin kitu ba kandang menua Selalang, Sarikei sereta ngaga sebuah kelinik din enggau lengkas.

Bela bisi ngulu aum enggau media nya Kaban Kunsil Nengeri (ADUN) Repok, Dr. Wong Hua Seh enggau sekeda bala kaban DAP bukai.

Advertisement