Anda di sini

‘International Conference on Action Research in Education 2014’ deka diatur kena 23-24 Sept

Advertisement

PELUANG BELAJAR ARI KONFERENS RENGGAT ANTARABANSA: Fatimah (tengah) begambar enggau bala Profes ti betuaika Zulwali Kifli (empat kiba).

KUCHING: ‘Sarawak association for the Development of Professionalism in Education’ (Profes), bekerejasama enggau Institut Pematih Pengajar kampus Batu Linatng deka ngatur sebengklah konferens antarabansa, ‘International Conference on Action Research in Education 2014’ (iCare 2014) kena 23-24 September 2014 di Hotel Pullman, Kuching.

Menteri Pengintu Pengelantang Pendiau, Pekara Indu enggau Pemansang Ruang Bilik, Datuk Fatimah Abdullah madah, Perintah menua Sarawak, gerempung tu berat lebih agi dalam betatika pekara pemansang ke bala pengajar.

“Enti kitai deka ngelatih pengajar ke bekualiti, pemerat iya nya beratika pengelandik pengajar nya seruran ditambah ninting taun enggau pemansang penemu ke seruran betambah sereta berubah,” ku Fatimah.

Iya madah baka nya lebuh baum enggau bala raban Profes ke bisi betemu enggau iya di opis iya di Bangunan Baitulmakmur ditu, betuaika chairman Profes, Dr Zulwali Kifli Merawi.

Konferens tu keterubah iya kala diatur di menua tu lalu deka ngerintaika speaker antarabansa ke mega ‘pakar’ dalam profesyen nyadi pengajar.

Speaker ke bisi dikangau ngagai konferens tu, iya nya Prof Dr Jean McNiff (York St John University, United Kingdom), Prof Emeritus of Education, Dr Christopher Day (Nottingham University, United Kingdom), Prof Emeritus of Educational research, Dr Bridget Somekh (Manchester Metropolitan University, United Kingdome) enggau dr Faridah Abu Hassan (Direktor Perambu Pelajar enggau pampang Pansik, Opis Menteri Pelajar) ke dijangka deka bejaku sereta mantaika keretas kereja sida.

Patron konferens antarabansa tu, Profes udah madu Datuk Fatimah Abdullah nyadi patron konferens tu.

Dijangka urung 300 penyereta ari bala pengajar ke ngajar di sekula, universiti, kolej, matrikulasi enggau IPG di serata menua enggau ari menua luar deka datai ngulu konferens tu.

Bayar masuk konferens tu, enti orang ari menua tu empu semina mayar RM350 seiku lalu sida ke datai ari menua luar, mayar USD$350, lalu sida ke ngerijista tumu ari 15 Mei deka diberi rebet RM50 tauka USD$50.

Format keretas penuh tau dilawa nengah laman web iCare, iya nya nengah http://ipbl.edu.my/icare.

Chek tauka deraf bank tau ditulis ngena nama PROFES lalu dianjung ngagai: The iCARE 2014 Secretariat, C/O Institute of Teacher Education Batu Lintang Campus, Jalan College, 93200 Kuching.

Kelimpah ari nya, Fatimah madahka dalam transformasyen pelajar di Malaysia, sekeda pekara dikemeratka, iya nya dalam pekara, pansik, chelak enggau inovasyen.

“Tu setpiak enggau peneka Perintah Malaysia beratika dalam proses transformasyen pelajar, sistem pelajar kitai deka nyadi sistem pelajar ke ngelatih tauka ngajar modal mensia ke bekualiti,” ku iya.

Profes bisi kaban urung 245 iku seumur hidup lalu udah nyelak urung 18 buah bup.

Advertisement