MIRI: Kaban ‘Special Committee Regarding Corruptions’ (JKMR) Senator Datuk Doris Brodie, meransang mensia mayuh nyukung pengawa munaska ulah makai suap.
Doris ke mega semina Indu tunggal ke nyadi kaban JKMR ari tujuh iku raban panel ti ngarika parlimen ari kededua piak perintah enggau penyakal madah, ngelaban pengawa makai suap nya tanggunpengawa semua rayat Malaysia enda ngira jalai politik, bansa enggau jalai pengarap.
“Don’t just be mere ‘gossipers’ or ‘hipocrites’. Let’s Walk The Talk; if indeed corruption(s) take place, report it’, “pia ku Doris lebuh ke dikerandau The Borneo Post nengah telefon ari tu sepengudah iya dichiri Yang Di Pertua Agong Malaysia, nyadi kaban panel nya di Kuala Lumpur, kemari.
Ku Doris, anggap runding ke salah sentang pengawa makai suap nadai mai pemaik ngagai menua kitai.
Ku iya, pengawa makai suap enda tau enda diripot sereta diketuka. Ripot pengawa suap enggau lengkas ngambika anggap runding pasal nya ulih dikemetulka.
Ku iya baru, pekara bekaul enggau pengawa makai suap sebengkah ari pekara ti amat dikemeratka perintah BN.
Doris ke mega Ketuai Indu Parti Rakyat Sarawak (PRS) madah, pengawa numbuhka ‘Special Committee Regarding Corruptions’ (JKMR) nya bepelasarka peminta nengah Artikel 14 Undang- Undang Munaska Pengawa Makai Suap Malaysia, Akta 2009 (Akta 694).
Ku iya, raban komiti ke dipilih ari Kaban Parlimen kededua piak perintah enggau penyakal nyengkaum seiku ari tetiap parti penyakal baka PAS, PKR enggau DAP.
Doris madahka, komiti JKMR deka bejalaika pengawa begempung enggau Kaunsil Pemunas Pengawa Makai Suap (MACC), ke alai batang pengawa ti dipejalaika kami nyengkaum meri lalau ngagai Menteri Besai ari semua sukut sentang sebarang penanggul pengawa makai suap ke nyadi di Malaysia.
Komiti nya mega deka ngaga ripot ninting taun kena nerangka pengawa ti dipejalaika sida ngagai Menteri Besai, sereta nyendiaka salin ripot nya sebedau Aum Parlimen, ku iya.
Iya meransang mensia mayuh anang nangi ngeripot pengawa makai suap ngagai raban bekuasa ti bekaul enggau kes makai suap ke bisi nyadi ba perintah enggau sektor luar.
Tu meh chara kitai nyaup perintah kena munaska pengawa ke jai ti nyadi ba raban bekuasa enggau orang ke deka meri makai suap, ku iya.