LALU MIH: Anthony (kiba) ngelaluka penatai Mawan.
Semua ketuai sereta kaban parti patut besaup ukai semina ngenegapka SPDP tang gempung dalam BN
KUCHING: Ketuai sereta kaban SPDP enda tau kepapas tauka rangka penemu tang patut nyeliahka ulah ti semina ngemeratka ngambika parti meruan tegap nengah gempung Barisan Nasional (BN).
Penemu tu dipansutka presiden SPDP Tan Sri William Mawan Ikom, seraya madah, enda milih tikas penyarut sekalika penemu ti enda senutuk enggau pangan diri, kitai patut bepegai ba batang penemu ti dirintai dalam sempekat ti ngemeratka semua.
“Kitai patut belalauka sempekat sereta pemereti ati ngambika kitai enda nguing ari juluk tuju. Enti kitai enda bebasaka ketuai dalam BN tauka semina ngemeratka diri aja, kita enda tejapaika pemansang ti ngujungka menua kitai deka tinggal, enda tejulukka perambu ti dikedeka,” ku Mawan ngelalau kaban parti.
“Kitai dalam BN patut ngemeratka parti, ukai diri empu. Enti dekaka penegap, genap iku kaban parti patut nyukung sebarang atur ti tau ngemujurka juluk ba timpuh ti panjai sereta meruan,” ku iya lebuh bejadika pengerami beserumpu Mantar Gawai Dayak ti diatur kelab rekreasyen SPDP Batu Kawa ba sebengkah restoren ditu malam Hari Enam tu tadi.
Mawan ti mega Menteri Pemansang Rama arap bendar, mayuh ketuai sereta kaban parti ti ngembuan pengelandik bela besaup bebantu ngambika parti majak kering.
Iya ngarapka semua kaban ukai semina angkun ke parti tang BN mega.
Berebak enggau nya, iya ngelalau semua kaban kelab pengatur pengawa besaup penemu ngenegapka parti lebih agi lebuh napi pemar.
“Aku mega ngarapka kaban kelab tu ulih bekunsi penemu enggau pangan diri ngambi teulihka ubah ke penguntung semua. Baka nya mega aku berasai gaga ninga sekeda ti ngulu pengerami tu datai ari mayuh bengkah genturung ari luar Batu Kawa.
Seraya muji kaul ari semua ti ngemujurka atur pengawa, iya mega madah: “Enti sema pampang ari genturung pendiau bukai ngatur pengawa beserumpu baka tu, tentu pampang Batu Kawa m,era deka nyaup”.
Maya nya mega Mawan ngemendar bantu RM20,000 ngagai kelab nya ngambika bisi dikena sida ngatur pengawa jemah ila.
Nengah penggi penyampau RM3,300 ari semua ti ngulu atur pengawa nya, Mawan mai sebuah lagu Cliff Richard ti dikumbai ‘The Young One’ sebedau dikelalu Ngetas Ranyai kena ngelai atur pengawa malam nya.
Bela bisi ngulu atur pengawa nya, ketuai kelab ke mega chairman pengatur pengawa enggau chairman SPDP pampang Batu Kawa Anthony Tukang; sekretari politik Kepala Menteri Kaunsilor Kijan Toynbee ti mega kaban exco SPDP; sapit ketuai pemadah SPDP Churchill E Drem enggau seiku orang dagang Albert Tanon sereta mayuh kaban parti sereta ketuai raban bansa.