Anda di sini

‘Sarawak Volunteers’ nerima sukung mensia mayuh

Advertisement

BEGEMPUNG MANTAI PENYINU: ‘Walk of Love, We Care, We Share’ betuaika Jamilah (lima kanan) berengkah nguluka urung lebih 6,000 iku mensia bejalai penyauh 2.9km.

ENDA MILIH BANSA: Pemayuh mensia ngayaka sukung ba atur pengawa endur mandangka penyinu.

Atur pengawa ‘Walk of Love’ ti berambaika leka jaku ‘We Share, We Care’ digulu beribu mensia

KUCHING: Urung 6,000 iku mensia ari pisuk mengeri Kuching bela begempung, nyukung ‘Sarawak Volunteers’ bejalai kaki ‘Walk of Love’ ti berambaika leka jaku ‘We Share, We Care’.

Atur pengawa ke dipun urung pukul 7 pagi betuaika bini Kepala Menteri, Puan Sri Dato Jamilah Anu, disempulang Menteri Pengintu Pengelantang Pendiau, Pekara Indu enggau Pemansang Ruang Bilik (KKWPK), Datuk Fatimah Abdullah di Le Park (belakang Dewan Suarah Kuching) nerima sukung ke chukup manah ari gerempung ukai dikuasa Perintah (NGO), opis perintah, palan pelajar tinggi (IPTA enggau IPTS), opis korporat, gerempung Orang Timpang Pendiau (OKU) sereta mensia mayuh bukai.

Pengawa bejalai kaki penyauh 2.9km nya mega, nengah Jalai Park Lane, Jalai Tabuan, mansa Merdeka Palace, enggau Amphitheatre mega digaga mandangka penyinu ngagai semua penumpang enggau krew bilun MH370 ke lalu apin  temu nyentuk diatu sereta meri sukung ngagai raban SAR (Search and Rescue) ke benung begigaka bilun Malaysia Airlines 370 diatu.

Taja pan, keterubah suba melaba, urung 6,000 mensia deka ngulu atur pengawa nya, tang didinga Hari Enam tu tadi, pemayuh nya  manggai 9,000 nyengkaum sida ke enda ngerijista diri.

Chura ke dilalau dikena, chura ‘lavender tauka purple’, ke dipeda baka tasik mensia ngemenuhka jalai di Bandaraya Kuching tumu pagi Hari Enam.

Anak mit mega sama enggau ngerami atur pengawa nya, nyengkaum bala anak mit ke berumur bebulan, ke diasur ngena ‘trolley’ ulih apai indai sida.

Sama bisi ngulu atur pengawa nya kemari, Menteri Muda Pengintu Pengelantang Pendiau, Robbert Lawson Chuat, Menteri Muda Pemun Pelajar Anak Mit enggau Pemansang Ruang Bilik Rosey Yunus, Sekretari Mendam KKWPK Rodziah Morshidi, Direktor Opis Pengintu Pengelantang Pendiau (PKS) Abg Samsuddin Abg Seruji enggau Direktor Biro Wanita, Noriah Ahmad.

Dalam jaku Fatimah maya nya, iya madah, iya berasai gaga bendar ati laban meda timbal ke chukup manah ari mensia mayuh ke sama-sama begempung nyukung pengawa opis menteri nya lalu ke berat agi mandangka sukung sida iya ba SAR ke benung ngiga bilun MH370 diatu.

“Kitai mandangka gempung, enda ngira bansa, pengarap sereta umur. Lalu pia mega, jaku peransang ke dibantai gerempung mandangka penyinu ati ngagai semua penumpang enggau kelasi bilun MH370,” ku iya.

Ba atur pengawa nya mega, macham aktiviti bisi diatur nyengkaum pengawa bejualka pemakai (alai mensia mayuh mega belepa di Le Park, beserumpu makai), barang-barang pengelandik jari sereta produk bukai. Lalu pia mega, bisi disengkaum pengawa chabut tikit betuah, enggau‘telematch’ ke bala anak mit.

MERUAN ARAPKA PEMULAI: Mensia mayuh meruan arapka pemulai semua penumpang enggau kelasi bilun MH370.

Advertisement