Anda di sini

Riot: Mensia mayuh dipinta meri timbal balas sentang gaji minimum

Advertisement

KUALA LUMPUR: Pengaji, pengereja pengawa enggau mensia mayuh dipinta meri timbal sentang polisi gaji minimum ti dipejalaika sebedau bulan Julai taun tu.

Menteri Pengereja Pengawa Datuk Richard Riot Jaem madah, pekara nya beguna amat ngambika iya ngenataika perambu nya ba aum enggau Kaunsil Gaji Menua, ke deka diatur dalam bulan tu.

“Aku minta mensia mayuh, nyengkaum pengaji enggau pengereja pengawa meri perambu ngagai kami sentang bakani chara kami ulih ngemanahka gaji minimum,” ku iya sepengudah ngelancharka ‘HR Risk Management Solution’ ditu ensana.

“Nengah nya, kami ulih nentuka gaji minimum dipejalaika enggau manah nengah chara menang-menang,” ku iya.

Laban diatu bisi 645,136 buah kompeni mit enggau petengan di Malaysia, bisi mar mimit bejalaika polisi mayar gaji minimum nya.

Dulu ari nya, lebuh bejaku, Riot madahka industri mit enggau petengan (SME) patut ngena atur pengereja pengawa enggau manah kena ngurangka penyampau kes ti nyadi dalam kaul pengawa dagang .

“Antara 2005-2012, 94,879 iti kes pengawa dagang  dilempaika ba Kot ‘Perhubungan Perusahaan’ lalu 10,500 iti kes agi dilempaika kia dalam taun 2013,” ku iya.

‘HR Risk Management Solution’ nya kerejasama antara i-HR Consultant Sdn Bhd enggau Tune Ins Holdings Bhd.

Nya nyengkaum nyendiaka penemu sentang pengereja pengawa nengah portal pengereja pengawa; nyendiaka lalau sentang pengereja pengawa ari raban pengatur pengawa enggau undang-undang sentang pengereja pengawa ke ngembuan mayuh peneleba sereta nyediaka Insurans Liabiliti Ngambi Orang Gawa. — Bernama

Advertisement