LUBOK ANTU: Kaban Parlimen Lubok Antu, William Nyalau Badak madah, perintah endang ngembuan juluk ngemuntangka servis perintah ngagai rayat nengah chara betemu sereta mendingka utai ti diguna sida.
Ku iya,berindik ari nya Opis Menteri Wang nengah Unit Strategi Nasional (NSU) enggau Perbendaharaan Malaysia Sarawak nengkebang program Palan Transformasyen Komuniti Mindah Kin Kitu (Mobile CTC) kena ngemujurka juluk nya.
Ku iya, servis ke beguna amat dalam program Mobile CTC nya baka Mykad, lisin deriba, pasport, kelinik pengerai, kelinik ngeli, meresa mata, ngerijista kompeni, pos mindah kin kitu, bebayarka zakat enggau servis meri jaku lalau.
“Kelimpah ari nya, nengah program Mobile CTC mega bantu ulih diberi terus ngagai orang ke patut di menua pesisir,” ku iya.
Aku arapka rayat di Lubok Antu ngena awak tu memanah ngulihka servis ti disedia sereta malutka diri ba program nya,” pia ku iya bejaku ba Program Palan Transformasyen Komuniti Mindah Kin Kitu, ditu kena Hari Enam minggu nyin tadi.
Lubok Antu palan ti kedua alai program nya diatur, lalu keterubah endar diatur ba Lundu kena bulan Disember taun nyin tadi.