KE PENGINGAT: Fatimah (tujuh kiba) begambar bebala mayuh enggau penyereta Lab Pemantapan Institusi Keluarga seraya disempulang Chuat (enam kiba), Rosey (empat kanan) enggau Noriah (dua kanan) sereta ke bukai.
KUCHING: Institusyen ruang bilik patut dikemanahka agi ngambika ulih nyungkak pengelantang raban bansa sereta menua, ku Menteri Pengintu Pengelantang Pendiau, Orang Indu enggau Pemansang Ruang Bilik, Datuk Fatimah Abdullah.
Iya madah, pengelantang ruang bilik enggau raban bansa ulih mantu menua tejapaika tikas menua maju.
Iya madahka ruang bilik iya nya unit ti pemadu mit dalam sebuah komuniti.
“Nya alai kami ba Kaunsil Indu enggau Ruang Bilik Sarawak ngasaika penegap institusyen ruang bilik nyadi sebengkah pekara ari lima ti pemadu dikemeratka kami ba taun 2014.
“Enti ruang bilik enda tegap bakani raban bansa ulih lantang lalu menua ulih nyadi maju. dikena ngenukuka pengelantang menua enggau rraban bansa patut bepun ari ruang bilik ti lantang,” ku iya.
Fatimah mansutka pekara nya lebuh bejaku ba ‘Majlis Penutupan Rasmi Lab Pemantapan Institusi Keluarga’ ti diatur Biro Indu di Wisma Wanita Jalan Sultan Tengah ditu, lemai ensana.
Tuju Lab nya diatur 3 ngaggai 4 April nya dikena ngulihka penemu tauka input kebuah enggau chara mutarka isu bekaul ari mayuh piak baka JAIS enggau ijinsi kebukai.
Nambahka nya dikena ngelala enggau nemu bagi isu sebedau jadi melaki bini, maya jadi melaki bini enggau pengudah jadi melaki bini lebih agi di Sarawak, kelimpah ari nentuka takah program enggau sistem sukung ejensi perintah.
Nengah program Lab tu mega, ulih ngemanahka polisi, program enggau sistem sukung institusi ruang bilik Sarawak.
Berebak enggau tu Fatimah bepenemu ejensi ti bekaul patut begempung ngatur program dikena nentuka juluk deka ngenegapka institusyen ruang bilik di menua tu.
“Sebedau tu beberapa taun ke udah mayuh program ti udah dipejalaika mayuh macham ejensi, bisi sekeda nya agi releven lalu sekeda enda.
“Program ti enda releven nya patut dikemanahka agi ngambikka senipak enggau ubah kemaya hari tu,” ku iya.
Kelimpah ari nya, iya madahka kes sarak di menua tu mega bisi nambah iya nya ambika banding bepelasarka rikod ari Jabatan Agama Islam Sarawak (JAIS) iya ba taun 2011 bisi 1,368 kes sarak, 1,440 kes (2012) enggau 1,739 ba taun 2013.
Nitih penerang ari Jabatan Bantuan Guaman Kuching ku iya, statistik sarak sivil ke dirikodka iya nya 512 kes ba taun 2011, 633 kes (2012), 475 kes (2013) enggau naka bulan Februari 2014 ngerikodka 61 kes sarak sivil.
“Aku pechaya penyampau ke amat ngelui ari nya (laban bisi enda ngerijista),” ku iya.
Bisi datai ba pengerami nya dua iku Menteri Muda iya Robert Lawson Chuat enggau Rosey Yunus, Direktor Biro Wanita Noriah Ahmad, Direktor Biro Perkhidmatan Pendidikan Sarawak Datuk Dr. Adi Badiozaman Tuah enggau ke bukai.