PRODUK DAGANG TEMUAI: Masing disempulang Residen Sarikei, Dahim Nadot ngemataka bot laju ke benung belumba.
NYANGKAIKA DIRI: Dua buah rakit baru nyangkaika diri ba terminal Kapit pagi kemari.
Mayuh pengaya rampa menua di nengeri tu patut dikena nempa produk baru ba dagang nya, ku Masing
KAPIT: Menteri Pemansang Tanah, Tan Sri Datuk Amar Dr James Jemut Masing minta Opis Dagang Temuai Malaysia enggau Opis Dagang Temuai Sarawak regas agi, nengkebang sereta ngena chara baru nempa produk dagang temuai ngambi tetapika peminta ari bala temuai.
Iya mega minta sekeda ejensi nguna peluang ari pengaya rampa menua di Kapit lebuh ke ngatur baru Pekit Berakit Baleh-Kapit taun dudi ila nyengkaum, lumba bot laju enggau lumba ensikal ba tanah bebukit.
“Pekit Berakit Baleh-Kapit endang pengerami dagang temuai ke diatur ninting taun, kena matak penatai temuai ke Kapit. Kelimpah ari berakit, kami mega bisi pekit lumba bot laju ke diatur Gerempung Lumba Bot Laju Pelilih Kapit (KDPBA), semadi ke nganti penatai bala pelumba rakit datai ba adan ditu.
“Kapit sebengkah ari palan ke pemadu manah di Sarawak. Taun baru pekit berakit, lumba bot laju enggau lumba ensikal ba tanah bebukit patut diatur sereta berebak enggau atur pengawa ke baka tu.
“Kitai patut ngatur pekit lumba ensikal ba tanah bebukit, laban kitai ngembuan rampa menua ke manah endur ngatur nya, ke mega lalu nyadi produk baru kena matak penatai bala temuai. Aku arapka Opis Dagang Temuai Malaysia enggau Opis Dagang Temuai Sarawak nempa produk baru seraya ngetanka produk lama. Perintah patut nempa produk baru, tang sektor peribit patut malut diri ba sentang nya ”, pia ku iya lebuh ke dikerandau The Borneo Post ba Terminal Kapit kemari.
“Baka ke diatu, aku bisi berasai asa mimit ati mimit laban nadai produk baru di Kapit taja pan Pekit Berakit Baleh-Kapit tu udah 19 kali diatur kenyau ari taun 1996, ke alai maya nya aku dalam Opis Menteri Dagang Temuai. Pemaik ari dagang temuai tu patut dikerembai besai ke agi. Anang bepanggai ba produk dagang temuai ke semina bisi di pasar tu aja. Kitai mega anang semina arapka sektor peribit nempa produk baru tang perintah ke patut nempa produk baru sereta malut sektor peribit,” pia ku iya.
Ku Masing, lumba bot laju nya endang chukup dikerindu, pekit berakit lama agi udah diatur tang mengkang dikerinduka. Taja pia, anang semina bisi sebengkah aja produk ba dagang temuai. Produk ba dagang temuai patut bisi berubah, lalu tempa mayuh agi produk bukai dikena napi peminta. Kitai enda tau enda landik nengkebang, ngena chara baru sereta regas napi peminta ari bala temuai ke semampai berubah nitihka ubah dunya.
Berebak enggau nya, Masing nadai kala enda datai ninting taun meda pekit berakit nya.
Bela bisi dia maya nya, Kaban Kunsil Nengeri Ngemah, Alexander Vincent, Sekretari Politik Kepala Menteri Sarawak, Wilson Nyabong, Residen Kapit, Fedrick John George, Residen Sarikei, Dahim Nadot, DO Kapit, Elvis Didit, chairman Gerempung Lumba Bot Laju Bagi Menua Kapit, Koh Kumbong enggau Pemesai Lumba enggau Main Kapit, Jack Janda.