SERIAN: Menteri Pemansang Infrastruktur enggau Penyambung Dato Sri Michael Manyin Jawong ngelalau ketuai raban bansa nyengkaum tuai rumah enggau ketuai genturung pendiau lebih tebuka runding sereta ulih nerima perambu ti dibantaika nembiak redak.
Nitihku iya, raban nya ti ngiring raban bansa enda patut ngerunding diri aja tang patut bisi kerejasama enggau peranak ke dipegai sida.
“Aku ngelalau bala ketaui raban bansa, nyengkaum ketuai genturung pendiau sereta tuai rumah ngambika enda selalu nulak perambu tauka penemu nembiak redak lalu semina deka nguna penemu enggau perambu diri aja.
“Kami ti nyadi orang tauka kaban politik bisi nerima ripot betulis ari nembiak redak ke pegai pasal ketuai genturung pendiau tauka tuai rumah ti kelalu enggai nerima perambu tauka penemu ti dikenataika maya baum lalu tu nyadika pekera ke patut dikeingat ti deka dipadah ngagai ngagai bala tu,” ku iya.
Iya mansutka pekara nya lebuh bejadika ‘Majlis Penyerahan Sijil Penyertaan dan Borang Dokumentasi Tanah NCR DBNA Fasa Dua’ di Dewan Masyarakat Serian ngagai 50 buah genturung pendiau di bagi menua tu.
Bisi datai ba pengerami tu, Presiden DBNA Datuk Ik Pahon Joyik, DO Serian ti mega chairman DBNA Serian Sinde Muling, Sekretari Politik Kepala Menteri John David Nyauh, Temenggong Bidayuh Samarahan Robert Sulis Ridu enggau Chairman Komiti Pengatur Dokumentasyen NCR Serian Charlie Ungang.
Manyin ti mega Kaban Kunsil Nengeri (ADUN) Tebedu mega ngelalau bala ketuai genturung pendiau enggau tuai rumah enda disambung mangku pengawa patut terus nyukung tuai ti nganti sida.
Ku iya, sekeda bala ketuai genturung pendiau tauka tuai rumah bisi ringat, taja pan enda mayuh lalu enggai nyukung penganti lebuh penggal enda disambung.
Pengari rayat dalam Barisan Nasional (BN) mega ku iya patut nerima nyema bisi diganti ke pemanah raban bansa.
“Nya alai aku ngingatka bala ketuai genturung pendiau tauka tuai rumah ngambika beterima kasih ngagai nembiak redak ti ngelama tu meri sukung tegap ngagai sida, lalu lebuh diganti ila sida patut mega meri sukung ti sebaka ngagai penganti,” ku iya.