SERIAN: Persatuan Kebangsaan Dayak Bidayuh (DBNA) deka terus bebendar nentuka lebih mayuh agi pengempu tanah Adat Bansa Asal (NCR) raban bansa Bidayuh masuk projek ngaga dokumentasyen tanah nerima geran pengempu.
Menteri Pemansang Infrastruktur enggau Penyambung Dato Sri Michael Manyin Jawong ti mega Penyanding Penemau DBNA madah, geran tanah nya ukai semina nunjukka sapa ti empu tanah tang mega meri peluang masuk bekebun betanam chara komersial, kelimpah diberi sabsidi enggau bantu perintah.
Ku iya, DBNA dikearapka Tuai Pemegai Menua Pehin Sri Abdul Taib Mahmud maya nya suba nyadi Kepala Menteri ti ngepun inisiatif pengawa nyukat perimeter tanah NCR baka ti dipejalaika Opis Tanah enggau Survei (JTS).
Laban ti semina JTS aja bisi kuasa nyukat tanah NCR, nya alai kitai dipinta nguna dokumentasyen ti mega ngena chara ti sebaka.
Semina nya nengah geran enggau nyukat tanah ti nunjukka tanah nya endang reta pengempu lalu kitai bebendar deka ngenukuka juluk tu nyadi nyata sereta terus bekempit enggau perintah sereta kepala menteri baru (Tan Sri Adenan Satem) laban kepala menteri ke sebadau tu meri sukung ti penuh ngagai pengawa tu,” ku iya.
Iya mansutka pekara nya lebuh bejadika ‘Majlis Penyerahan Sijil Penyertaan dan Borang Dokumentasi Tanah NCR DBNA Fasa Dua’ di Dewan Masyarakat Serian ungkup 50 genturung pendiau di bagi menua tu, ensana.
Bisi datai maya nya, Presiden DBNA Datuk Ik Pahon Joyik, DO Serian ti mega chairman DBNA Serian Sinde Muling, Sekretari Politik Kepala Menteri John David Nyaun, Temenggong Bidayuh Samarahan Robert Sulis Ridu, enggau Chairman Jawatankuasa Penyelarasan Dokumentasi NCR Serian Charlie Ungang.
Serian bisi 162 genturung pendiau Bidayuh ke alai enam ari penyampau nya udah bejalaika projek dokumentasyen tanah ti mungkur pengawa ngaga ngemanahka rijista tanah NCR, survei enggau kar tanah NCR sereta pemansang enggau pejalai langkar sereta sistem organisasyen pengurus tanah NCR di geturung pendiau Bidayuh.
Naka ke diatu semina dua genturung pendiau Bidayuh iya nya Genturung Pendiau Skuduk ti semak enggau Tapah sereta Kampung Pisa di Krokong, Bau udah nerima geran tanah nya.
Manyin madah, inisiatif dokumntasyen tanah NCR ba raban bansa Bidayuh dikearapka ulih ngurangka ulah berebut ngempu tanah enggau garis tanah entara diri sebilik.
Nitihku iya, nya chara ti pemadu manah dikena napi penyarut entara ruang bilik laban mayuh kes tanah dibai ngagai kot ke bedau ulih diputarka.
Di baruh Ordinan Tanah Sarawak ku iya, pengawa nyukat tanah semina dipejalaika JTS, tang ke dikereja DBNA dikena ngemuntang, ngenyampat enggau ngurangka penanggul besai iya nya berebutka tanah.
Mayuh kes baka tu dibai sama diri sebilik ngagai kot ke bedau diputarka ngena chara manah lalau chara pemadu manah iya nya dokumentasy tanah nya,” ku iya.
Ku iya, projek nya nyaga tanah adat genturung pendiau kelimpah ari ngemuntang pengawa ngeluarka surat tanah Bumiputera ari perintah jemah ila.
Kar ti dikeluarka DBNA dikemendar JTS laban manual dikena ngadu dokumentasy ti sama dikena opis nya bejalaika pengawa nyukat kelingi,” ku iya.