Anda di sini

Adenan: Raban kaunsilor dilalau ngemeratka pemansang, peneka rayat

Advertisement

LUNDU: Kepala Menteri Tan Sri Datuk Amar Adenan Satem ngansak raban kaunsilor bejalaika tanggungpengawa enggau naka pemanah enda ngira mit tauka besai bungkur pengawa nya.

Ku iya, semua orang ngembuan tanggung pengawa diri ke alai kepala menteri sereta raban kaunsilor enda lari ari pekara nya.

“Baik nya mit, besai tauka jelan pemesai kitai sigi megai tanggungpengawa.

“Rayat ngembuan peneka lalu sigi pengawa kitai bejalaika tanggungpengawa lalu ngemantup peneka rayat,’ ku iya bejaku ba pengawa Angkat Sumpah Raban Komiti Opis Kaunsil Pelilih Mit Lundu ke diatur di Opis Pelilih Lundu, ensana.

Iya ngarap raban kaunsilor ke baru dichiri enggau ti mengkang dipilih mangku pengawa ungkup Pelilih mit Lundu ulih bejalaika tanggungpengawa enggau manah.

“Aku nyamin duit ukai nyadi penanggul ungkup kitai ngemujur pengawa. Aku enggai ninga projek tejanggal ketegal suntuk belanja.

“Taja pia, anang minta kelalu besai,’ku iya nambah seraya ti gaga enti mayuh projek dipejalai di Lundu.

Sepenyampau 30 iku kaunsilor besumpah mangku pengawa ba mua Adenan ke alai sida diuluka chairman ke mega pemesai pelilih mit Lundu ke baru Hamsein Atar.

Kelimpah ari nya, ketegal ngemerat pemanah servis ari raban kaunsilor ngagai rayat, Adenan ngansak komiti baru opis kaunsil Lundu nundaka atur ti udah dipejalai Opis Kaunsil Kandang Padawan (MPP) ti betuaika Lo Khere Chiang.

Ku iya, di Padawan raban kaunsilor udah diungkup nyaga tauka meri servis ba sebengkah sitak kandang endur ti udah ditetap.

Bela datai kaban Parlimen Santubong ke mega Sapit Menteri Dalam Menua Datuk Dr Wan Junaidi Tuanku Jaafar, ADUN Opar Ranum Mina, MP Mas Gading Anthony Nogeh, Pemangku Residen Kuching Zamahari Saidi enggau orang bukai.

Advertisement