SIBU: Peranak Rumah Adin Jawa di Sungai Engkalat ke dituntung penusah angus empai lama udah nerima bantu ari Kelab Lions Sibu Bawang Assan.
Kelab Lions Sibu Bawang Assan udah nyuaka bantu baka pemakai enggau utai ke diguna ninting hari. Bantu nya udah disuaka Chairman pengatur bantu, Glyn Ho ngagai Tuai Rumah Adin Jawa kena Hari Empat tu tadi.
Pengawa nyuaka bantu nya dikemataka Menteri Wang Kedua ke mega Menteri Kandang Menua enggau Pemansang Komuniti sereta Kaban Kunsil Nengeri (ADUN) Bawang Assan, Dato Sri Wong Soon Koh.
Bela bisi dia maya nya Chairman Majlis Perbandaran Sibu (MPS) Datuk Tiong Thai King, Sekreteri Politik Kepala Menteri Andrew Shilling Bangit enggau Pau Kiew Chuang, Pemancha Stanley Geramong sereta Presiden Kelab Lions Sibu Bawang Assan, Helen Pang.
Kebuh ke berandau enggau pengarang berita, Glyn madah, pemeri nya sebengkah ari atur pengawa pengasih Kelab Lions Sibu Bawang Assan kelebih agi kena mantu orang ke tasah.
“Kelab Lions Sibu Bawang Assan arapka pemeri nya ulih nyaup ngelempungka tating pengidup sida ke tasah nya.Kami mega arap semua ulih begempung mantu peranak Rh Adin Jawa ke tasah tu,” ku iya.
Penusah angus ke nyadi urung pukul 8.30 pagi kena 3 April tu tadi udah nganguska 22 pintu ti ngujungka sida nadai agi alai diau.
Penuai Rumah panjai ke angus nya lebih 60 taun, sereta penusah rumah panjai angus ti keterubah endar nyadi di Pelilih Mit Sibu dalam kandang taun tu.