KOMITI BARU: Kaban Supreme Council DCCI 2014-2016 ti diketuaika Salang (dua kanan) sereta sapit iya Kilat (dua kiba).
Raban Supreme Council ke baru deka chakah mekuh pengawa dikena nyapai juluk penumbuh DCCI
KUCHING: Datuk Joseph Salang Gandum udah dipilih nyadi Presiden Balai Dagang enggau Industri Dayak (DCCI) penggal 2014-2016.
Dulu ari tu penuduk presiden nya dipegai Tan Sri Datuk Amar Leo Moggie ba penggal 2008–2011 enggau 2011-2014, lalu udah tu nyadi raban panel penyanding penemu.
Sapit Salang iya nya Kilat Beriak, nganti penuduk Tan Sri Datuk Seri Celestine Ujang Jilan (2008–2011 enggau 2011–2014).
Lebuh dikerandau pengarang berita kemari, Salang madahka bala raban Supreme Council DCCI ke baru deka chakah sereta nampung atur pengawa ti udah dikemeran sereta dikemeratka pengelama udah ditumbuhka.
“Aku ngarapka nengah komiti baru tu, kami ulih nampung pemujur pengawa ti udah dipejalaika raban ke lama, lalu enggau ubah ke baru tu ngarapka kitai ulih neleba diri enggau gaya ke baru.
“Nya ngambika DCCI deka terus releven sereta lebih releven dalam timpuh 12 taun ke deka datai,” ku iya seraya madahka pengawa bepilih DCCI diatur tiga taun sekali.
Salang dikerandau pengudah Baum Ninting Taun DCCI Ke-12 sereta pengawa bepilih baru kaban Supreme Council DCCI 2014-2016 ti diatur ba sebengkah hotel ditu, kemari.
Bejaku baru iya ngarapka nengah kaban Supreme Council ke baru nya sereta kaban DCCI ti bebiak sereta datai ari mayuh macham pengawa ulih mantu ngangkat DCCI ke penguntung raban Dayak.
“Naka ke diatu kami nadai ngaga sebarang ubah ngenyit, baka ti dipadahka aku tadi kami deka ngenegapka pekara ti udah dikembuan tauka dipejalaika,” ku iya.
Ba pengawa bepilih kaban Supreme Council DCCI (2014-2016) ke diatur kemari, bisi lima iku dipilih nyadi Mandal Presiden iya nya Leonard Martin Uning; Christopher Gira; Livan Tajang; Gerawat Gala enggau Dato Winsel Ahtos.
Libat Langub dipilih nyadi sekretari lalu Allan Keripin Nangkai nyadi tukang wang.
Kaban Selama Supreme Council iya nya Bell Anggan, Dr. Joseph Jawa, Bangsa Untang, Major Peter Runin, Telajan Luyoh, Paul Raja, Peter Udang Sagan, Ambrose Jarat, Leornad Jambu enggau Florince Christy.
Urung 100 iku kaban DCCI ke datai ari Sibu, Miri, Bintulu enggau ke bukai kelimpah ari Kuching bisi datai ngulu aum nya kemari.