KUCHING: Pemanah tanggung pengawa ke udah dipejalai Balai Dagang enggau Industri Dayak (DCCI) patut dinan sereta disukung orang dagang Dayak.
Sapit presiden DCCI Tan Sri Celestine Ujang madah pekara nya chukup berat ketegal DCCI mangku tanggung pengawa ngintu pemaik, penegap orang dagang Dayak kelimpah nyendia penepan endur sida ngaul diri ba mayuh bengkah pekara dagang.
“Kenyau ditumbuh 12 taun ke udah, DCCI nerima timbal ke manah sereta dipebasa raban orang dagang.
“Nyentukka diatu, gerempung udah ngerijister enda kurang ari 600 iku kaban ke nyadi orang dagang di serata nengeri.
“DCCI angkun nentuka juluk ngangkatka orang dagang Dayak dipajak,” ku iya.
Ujang mansutka jaku tu ba pengerami makai lemai ‘Malam Serumpu DCCI 2014’ di siti hotel tebilang ditu, malam ensanus.
Malam Serumpu DCCI 2014 diatur nyerumba Aum Tiga Taun Sekali (TGM) ke deka diadu pagila (sehari tu).
Ba pengerami nya, presiden Tan Sri Leo Moggie bisi nyuaka setipikit nyadi kaban baru gerempung ngagai orang dagang Dayak ari tiap pelilih menua.
Ngenang senentang TGM, Ujang netapka seduai presiden (Moggie) deka ngelengkaka pangku pengawa lalu ngelempaika pemutus maya aum nya nentuka presiden enggau sapit presiden ke baru.
“Tan Sri Presiden enggai nyadi enda ngelengka pangku pengawa ketegal konstitusyen DCCI netapka presiden nguluka gerempung ungkup timpuh dua renggat aja.
“Aku ngelengka pangku pengawa nyadi sapit presiden ketegal enda tentu bepengerai maya ke diatu,” ku iya.
Kitai meri basa enggau puji ngagai presiden ti udah ngempung, ngiring DCCI sereta orang dagang Dayak ungkup pemaik komuniti Dayak, tandu iya.
Ba pengerami nya mega, DCCI ngundang Asociate Profesor Madya Rami Bulan meri licha ‘Native Customary Land Rights, Sarawak-Current Issues and Challanges’.
Rami mujur matak raban temuai duduk jenuh mendingka penemu iya ba senentang isu NCR pengelama setengah jam ke alai iya mai sida beratika kes Nor anak Nyawai.
Bela datai Sapit Kepala Menteri Datuk Patinggi Tan Sri Alfred Jabu, Menteri Muda Perengka Guna Mensia Mayuh Datuk Dr. Stephen Rundi, Temenggung James Jimbun Pungga enggau orang bukai.