TEPA: Adenan (tengah) nerima tepa bup ‘Mencorak Destini’ ari Sahol (dua kiba) ba penemuai sida seraban kemari.
KUCHING: Universiti Teknologi Mara (UiTM) nengah kerejasama Asia Pacific Business Excellence Standard (APBEST) Academy dipilih ngatur Aum Antarabangsa ISO enggau TQM (ICIT) ke 18 pengelama 3 hari berunggu berengkah 21 nyentuk 23 April 2014 di Hotel Riverside Majestic ditu.
Aum nya deka dipenyadi Kepala Menteri Tan Sri Datuk Amar Adenan Satem ke alai urung 300 iku penyereta deka datai ngulu aum nya lalu keretas pansik ke diadu raban delegasyen ari lebih 30 buah menua luar deka dipejurai.
Besuluka rambai jaku ‘Enhancing Growth and Producticvity through Best Practises in Total Quality Management (TQM), 18-ICIT ngemeratka chara pemadu manah ngemeran sistem ISO enggau nentuka TQM meri pangka ba gaya kualiti dalam ekonomi baru.
Juluk 18-ICIT iya nya nyendia siti forum endur ngelala pemansang kontemporari nengah teori enggau atur TQM ari serata dunya kelimpah tau dikena endur bekunsika peneleba.
“Iya mega ngembuan tuju ngambika sedarka pengawa nguna piawaian ISO enggau TQM dikena nyungkak pemansang sereta ngemansutka produk tauka ngenataika servis ari sesebuah organisasyen nengah chara ke engkeman.”,” ku Dr Sahol.
Kemari Mandal Canselor UiTM Tan Sri Dato Sri Prof Ir. Dr. Sahol Hamid Abu Bakar nguluka raban ari UiTM ke bukai nemuai betemu enggau Kepala Menteri Tan Sri Datuk Amar Adenan Satem ngenataika berita 18-ICIT di Wisma Bapa ditu.
Aum tu diadu ninting taun ba mayuh bengkah universiti di serata dunya lalu dipungkal ba taun 1996 di Leicester Business School, De MontFort University, United Kingdom.
Bedau lama tu tadi, 17-ICIT diadu di University of Technology Sydney, Australia.
Malaysia kala ngadu aum ke sebaka ungkup 13-ICIT (2008) enggau 15-ICIT (2011) di Kuala Lumpur.
Mensia mayuh, kompeni peribit enggau ijinsi perintah diperansang enggau ngulu 18-ICIT ke alai penerang ke silik tau diulih ari laman web http://www.icit18.net tauka http://www.hk5sa.com/icit/.