SIBU: Maya nganjung nama chalun ba pengawa bepilih pampang zon tengah Sarawak Parti Keadilan Rakyat (PKR) ditetapka kena 6 April.
Chairman PKR Lanang George Chen madahka, pampang iya deka ngatur maya nganjung nama chalun nya belabuh ari pukul 10 pagi ngagai 5 lemai di Opis PKR Lanang, Pusat Tanahwang ba Jalai Pedada ditu.
“Pengawa bepilih tikas pampang nya diatur beserimbai enggau pengawa bepilih parti ke deka milih komiti baru ungkup renggat 2014-2017.
“Bisi 10 iti pampang ba zon tengah ditu baka Sarikei, Tanjong Manis, Igan, Mukah, Selangau, Julau, Kapit, Sibu, Lanang enggau Kanowit,” ku iya ba aum enggau media ditu ensana.
Pangku pengawa ti dipetandingka maya bepilih tikas pampang nya ila nyengkaum chairman pampang, sapit chairman, mandal chairman enggau 15 iti pangku pengawa nyadi kaban komiti.
“Pengawa ngundi nya deka diatur kena 26 tauka 27 27 tauka dalam kededua hari nya, deka diputuska pampang, ku iya.
Ba sebengkah agi pekara, iya madahka pampang PKR Lanang bisi nerima sekeda sebana ari mensia mayuh bekaul enggau sekeda palan karaoke ti bebuka ngelui ari jam ti ditetapka.
Ku iya, pekara nya ngachau pengelikun orang ke diau ba kandang endur nya.
Ku iya, pampang PKR Lanang udah madahka pekara nya ngagai Opis Kaunsil Sibu (SMC), tang naka ke diatu kaunsil lalu nadai mutarka penanggul nya.
Bela bisi ngulu aum enggau media nya Sekretari PKR Kanowit Thomas Laja, chairman PKR Mukah Kassim Mahsin enggau secretari PKR Mukah Suriati Abdullah.