KUCHING: Pekara bekaul enggau betapi sereta nyeliahka penusah angus rumah panjai entara pekara ti dikemerat sereta dipejuraika dalam simposium Iban ke deka datai.
Menteri Pemansang Rama, Tan Sri William Mawan Ikom madah, nya berindik ari penusah angus rumah panjai majak nambah nyadi di nengeri tu.
Nya madangka rumah panjai baka ti enda likun endur diau, ku iya.
Iya madahka pekara nya patut dikerandau sereta dipejuraika enggau bala tuai rumah ngambika nemu ngiga jalai mutarka penusah nya.
“Mayuh rumah panjai angus. Aku enda nemu nama kebuah. Sebedau tu nadai mayuh penusah angus rumah panjai nyadi taja pan sistem masang tali karan ngena chara ti likun.
“Nya alai kitai minta raban bansa lebih agi peranak rumah panjai beratka penusah tu sekalika nyadi tauka enda. Pekara tu deka dikemeratka maya simposium Iban ke deka datai,” ku iya ti nyai Kaban Parlimen Saratok.
Mawan mansutka pekara nya lebuh dikerandau pengarang berita ba opis iya di Bangunan Baitul Makmur ngalih hari kemari.
Dulu ari nya iya baum enggau raban tuai raban bansa sereta pemesai ari opis residen enggau Opis Pelilih Menua Bagi Menua Sarikei.
Dalam riput surat kabar kemari, lebih 300 iku peranak rumah panjai semina tinggal gari ba punggung aja ketegal penusah angus ti nuntung dua buah rumah panjai iya nya di Sibu enggau Saratok pagi ensanus.
Ba penusah keterubah sepenyampau 24 ari 70 pintu Rumah Adin Jawa di Sungai Engkalat kena penusah aguns urung pukul 8.30 pagi ensanus, ti ngujungka 124 peranak rumah panjai nya nadai endur diau.
Nambahka nya ba penusah angus kedua ensanus nuntung Rumah Kayan Tarang, Nanga Telik, Krian, Saratok ti bisi 25 pintu, angus urung pukul 10 pagi ensanus, ti ngeruga urung 200 iku peranak rumah panjai nya.
Ngenang aum enggau tuai raban bansa, iya madahka nya bekaul enggau mansik baru pengawa nyiri enggau nyambung pengawa nyadi tuai raban bansa.
Ku iya ti nyadi Kaban Kunsil Nengeri (ADUN) Pakan madah, nya diatur nengah kerejasama ijinsi perintah baka sekretari nengeri enggau menteri ba kandang menua nya.
“Opis Residen benung mansik baru pemilih laban deka nyambung servis sekeda tuai raban bansa, ketua kampung enggau tuai rumah. Aku nemu pekara tu.
“Kitai ngiga penemu orang, enti sida ‘manchal’ lalu pengawa sida enda setipak enggau peneka sereta pengawa perintah, sida enda ulih dipilih enti sida semina nemu nganu perintah,” ku iya.