SRI AMAN: Pengawa ngaga tiga jalai besai Bukit Tungku/Sayat/Soh/Seremat enggau Engkilili /Bukong/Changkul ke beungkus RM22.46 juta tu dipelabaka deka berengkah ba bulan Mei tu.
Opis Menteri Pemansang Menua Pesisir enggau Kandang Menua Datuk Seri Mohd Shafie Apdal madah, pengawa ngaga ketiga-tiga jalai besai sepenyauh 34 kilometer tu dalam proses meri tinda ngagai kompeni ke dipilih bejalaika projek tu.
Ku iya, kebuah projek tu laun berengkah ketegal sekeda penanggul baka minta agih belanja enggau minta pemendar belanja tambah baka kediatu.
“Bisi laun mimit bejalaika projek ngaga jalai besai tu laban semua agih tambah benung dikerandau ba aum parlimen diatu,” ku iya.
Iya bejaku munyi nya maya nyaut tanya Kaban Parlimen Lubok Antu William Nyalau anak Badak ke nanya bekaul enggau status Jalai Bukit Tungku/Sayat/Soh/Seremat enggau Engkilili /Bukong/Changkul dalam Aum Parlimen di Dewan Parlimen, Kuala Lumpur kena Hari Dua tu tadi.
Maya dikerandau, Nyalau madahka diri berasai gaga ati ninga saut ari Shafie bekaul enggau ketetiga pekara nya.
“Aku bangat gaga ati lebuh ninga saut menteri bekaul enggau projek nya ti tau bendar mai penguntung ngagai rayat pegai aku,” ku iya.
Berindik ari nya, Nyalau ke peranak asal ada ba rumah panjai Sayat ngarapka kontrakktor ke dipilih bejalaika projek nya enggau manah sereta mujur ila.
“Aku ngarapka ke dipilih chukup bajet ngambika pengawa nembuka projek nya bejalai enggau mujur,” ku iya.