BAKA PULAU: Perau tambang udah nyadi sebengkah batang chara mindah kin kitu ungkup peranak Kpg Beliong besambung ngagai dunya luar.
ASAJAYA: Kampung Beliong, urung 70 kilometer (km) penyauh ari Kuching, nya sekeda ari kandang menua pesisir di negeri tu ke agi bepanggai ba sungai nyadika chara dikena mindah kin kitu.
Taja pan pemansang endang ayan di peliling kandang endur dia, pemindah nengah sungai agi majak dikena urung 1,000 iku mensia di Kpg Beliong ke enda besambung enggau jalai besai. Ninting hari peranak dia, enggai enda pan meranika diri empu betempuh enggau ai deras nyelayang Sungai Beliong ngambika ulih meda dunya luar.
Kaunsilor Bustari Ibrahim, 64, madahka ujan tauka panas, nya endang ke batang alai mensai mayuh ngelayang ke sepiak ngagai pasar ke semak nya Asajaya tauka Kota Samarahan nurun gawa tauka bejualka asil ari betanam betupi.
Iya nambahka, beperau udah nyadi batang chara dikena mindah kin kitu ditu lebih ari 94 taun ke udah kenyau genturung pendiau tu ditumbuh. Orang menua ditu udah tebalan enggau chara mindah nengah sungai laban ke nadai chara mindah bukai ari menya.
Kpg Beliong bisi lebih ari 100 pintu ke diuan raban bansa Melayu, Iban enggau China ku tambah iya.
“Nadai jaku alai nyemaka pemedis peranak ditu. Suah agi sida bebelanja besai dikena nambang asil produk sida maya dijual ngagai pasar.
“Lebuh datai maya begagaka rumah, bebaika bata, semin, papan lapis nya sekeda ari pemar benda.Kami enggai enda pan bebelanja lebih betambangka perau dikena beangkutka ramu. Nambahka nya bisi kes alai mutosikal bisi udah labuh ke dalam sungai setegal perau penambang nya karam.
“Semina orang ke kala betapi enggau penusah ke baka tu di serata negeri ulih meretika penusah tu,” ku Bustari ngerandau pemberita di kampung tu bedau lama ke udah.
Iya bekenangka penusah peranak ditu laban ke nadai besambung enggau jalai besai tauaka jematan. Kampung tu udah matak mayuh bansa China ke datai besembiang ba Tupikung ke semak dia maya ujung minggu.
Ba kaul ke bukai, iya madahka pemansang infrastruktur di Asajaya udah ngemandakka jam pejalai ke alai orang ditu enda ibuh ke Pending enti ke Kuching.
Diatu, peranak diatu semina muai beberapa minit ngelayang ngena perau tambang ke minta bebayar RM1 seiku enggau RM3 enti ngundan mutosikal.
Iya ngarapka perintah bisi perambu begagaka jematan taja pan bisi udah perambu nyambung kandang endur tu enggau jalai ke bisi ari Insititut Pematih Industri (ILP) ke diatu udah datai ba Kpg Tanjung Bako.
Ba pekara bukai, Bustari madahka jalai di kampung nya manjai 2 km patut dibelakin. Peranak dia mega ngarapka balai raya mega digaga.
“Kami nadai balai raya ungkup peranak bejalaika aktiviti. Kami udah bisi nyendiaka tapak tang agi nganti pemendar ari perintah awakka mupuk ngaga,” tambah iya.