KUCHING: Barisan Nasional (BN) enda tau enda beratika semua semaya ke digaga maya kimpin Pengawa Bepilih Mit (PRK) Balingian bedau lama tu tadi patut dikeamatka.
Mandal Chairman Parti Keadilan Rakyat (PKR) Sarawak ti mega nyadi ADUN Batu Lintang See Chee How (gambar) madah Kepala Menteri Tan Sri Datuk Amar Adenan Satem patut ngeletakka haribulan penudi projek pemansang ke nyauka manggai RM600 juta ti disemayaka BN ungkup sitak Balingian patut digaga magang.
Iya madah PKR enda nagang Kepala Menteri enggau kaban Barisan Nasional (BN) menua ngerami pemenang sida iya di Balingian tang pekara ke berat agi, iya nya semaya ke digaga BN patut dikeamatka.
“Janji ti dipadah Sapit Menteri Besai (Tan Sri Muhyiddin Yassin), Kepala Menteri, menteri-menteri ari Perintah Besai sereta menua maya kimpin PRK Balingian ukai baka telur penyu.
“Enti penyakal tauka Pakatan Rakyat baka manuk munyi ke dipadah Kepala Menteri bedau lama tu tadi, pelaba aku manuk nya udah ngereja pengawa sida iya enggau mujur endar dalam PRK Balingian,”ku iya madah ba aum media ke sama digulu chairman PKR Nengeri Baru Bian ditu, ensana.
Ku See, penyakal ‘empekak’ ngambika BN ba renggat perintah besai enggau menua beratika sitak Mukah-Balingian, alai ngelama tu jauh endar kena tinggal pemansang kelebih agi dalam pekara perengka guna.
Iya madah lebuh nimbal jaku Adenan bekaul enggau ‘Go Rural Project’ Parti Tindakan Demokratik (DAP) ba siti aum media bedau lama tu tadi munyi ke madahka penyakal nya baka ‘manuk betelu sigi, lalu empekak segenturung pendiau’, lalu BN disemaka baka penyu, taja pan betelu 100 igi ke bekualiti tang enda memunyi.
“Terang endar Kepala Menteri enda mereti pasal penyu enggau chara penyu betelu….Kebuah penyu betelu mayuh, iya nya semina 6080 peratus telu penyu nya deka netas, peratus ke mit endar ari manuk, kelimpah ari dikachau orang ke makai anak penyu lalu pansik beratika, ari 10,000 anak penyu ke pansut, semina 1,000 iku aja ke deka mansang besai.
“Nya alai, aku irau ati lebuh Kepala Menteri madahka BN ngaga projek pemansang baka ke disemaya sida iya baka penyu ke betelu laban semina mimit janji ke ditabur nya digaga ila,” ku See.