KUCHING: Raban kaunsilor, baik sida ti megai tanggungpengawa ngiring penuku pendiau nembiak sekula tauka mantu komuniti deka nerima sukung ari perintah.
Menteri Pengintu Pengelantang Pendiau, Orang Indu enggau Pemansang Ruang Bilik Datuk Fatimah Abdullah (gambar) madah, nengah bantu enggau program ke disedia raban kaunsilor ulih ngangkatka tikas pengelandik kelimpah ari bekunsi peneleba enggau pangan diri.
“Konselar bela megai tanggungpengawa besai ba pengawa nerenak pemereti rama dalam komuniti ke alai perintah beratika pekara tu enggau berat.
“Bengkah pekara ke ditangkup sida tu chukup besai lalu nya mungkur pemansang ba penyauh tikas kereja ke dijapai, pekara rama, pengelantang pendiau sereta mantu ngiring pejalai raban nembiak ba pengawa besekula,” ku iya.
Fatimah mansutka jaku tu ngagai pemberita pengudah nerima penemuai seraban orang ari Gerempung Kaunseling Malaysia Antarabangsa (PERKAMA) di Begunan Baitul Makmur Petra Jaya ditu, kemari.
Iya nambah, ba dunya kemaya hari, servis raban kaunsilor tau nyaup mutar lalu ngurangka kes rama ti majak nyadi nyengkaum mutarka kes munuh diri, sarak, kusut runding sereta penusah rama ke bukai.
“Ba pekara tu meh servis raban kaunsilor ditagih, sida mega tau nyaup ngurangka sekeda kes rama lalu perintah sereta ejensi peribit deka seruran nyaup,” ku iya.
Ngenang kaul ke sama, Fatimah madah penyampau raban kaunsilor ti udah ngerijista diri ba Kaunsil Kaunseling Malaysia di serata Malaysia manggai 5,137 iku ke alai ari penyampau nya 249 iku di Sarawak.
Iya mega madah ba serata Malaysia, urung 600 iku pengajar udah diangkat nyadi kaunsilor ke setipak enggau perambu 500 iku nembiak diarika seiku pengajar kaunseling.
PERKAMA ungkup keterubah iya deka ngadu ‘The 1st Malaysia International Counselling Conference (MICC2014) pengelama tiga hari berunggu berengkah 29 ngagai 31 Oktober 2014.
Penemuai raban PERKAMA kemari diketuaika Kaban Eksekutif PERKAMA International Zon Sarawak Amalia Madihie.