Sida mayuh tanah, begunaka penyungkak ekonomi ba timpuh ke panjai, ukai semina bantu e-Kasih aja
MIRI: Perintah patut meransang raban bansa Penan ngemeranka pengawa betanam lebih agi getah tauka Gharu berindik ari pemanah rampa menua di Ulu Baram endur ngereja pengawa nya.
Kaban Komiti Protem Peranak Long San Anthony Lawai Karing (gambar) madah, raban bansa Penan ulih ngereja dua tiga ika tanah endur nanam getah enti diberi sabsidi ari perintah.
“Atur pengawa tu tau bendar nyungkak penatai pemisi ruang bilik sida ba awak ke panjai enti dibanding semina nerima bantu e-Kasih ari perintah,” ku Anthony.
Anthony ti kala gawa ba Opis Betanam Betupi madah, bansa Orang Ulu pia mega Penan rajin gawa, sida mega bisi tanah endur ngereja pengawa betanam ti tau nguntungka sida ba timpuh panjai.
“Kitai sinu meda bansa Penan semina diberi perintah bantu tang enda diberi awak ngemansangka diri ba pengawa betanam betupi taja pan sida mayuh tanah,” tandu iya.
Tandu Anthony, Penan tu bansa orang ti rajin gawa enti diberi awak ngereja pengawa betanam betupi lebih agi enti sida ngemeranka pengawa nanam getah ngambika bisi ditunda sereta diteladan bansa Orang Ulu.
Taja pia, diatu endang amat tusah minta sabsidi laban opis ti bekuasa ngemansangka atur nanam getah begunaka surat tanah, ditu mih perintah ngena atur ti menuku sereta tau nguntungka bansa Penan.
Iya ke mega ex-kaunsilor pelilih mit Baram madah, bansa Penan begunaka pengari ngambika bisi ngemataka pemansang ekonomi sida, ukai ngarapka bantu ari perintah aja tang patut ngambi bagi ba pemansang tanah.
Kelimpah ari nanam getah, tandu Anthony, bansa Penan mega patut diajar nanam kayu Gharu, nya nyadi pilih ke-dua sida.
“Baka ti dipeda aku, ukai semina pemansang tanah lubah datai ba raban bansa Penan tauka Orang Ulu tang kompeni ti bejalaika pemansang tanah semina ngulihka untung diri lebuh neresa kampung tuai di sitak Baram,” tandu iya seraya minta perintah merambuka atur pemansang ba timpuh ke panjai ungkup sida tu.
Iya mega madah, sida Penan enda ibuh diberi kereban pengawa betanam ke enda ditemu sida, nya muntang rusak laban sida enda nemu ngena perengka nya.
Sida tu patut diberi latih enggau menuku lalu pia mega perintah tau meri sabsidi ba atur pengawa betanam getah ngagai sida, ku iya.