Perintah deka majak ngerembaika atur pemansang ba menua pesisir enggau ulu entigis
ENGKILILI: Perintah nengeri deka majak ngemansangka menua pesisir enggau di ulu entigis, ku Kaban Parlimen Lubok Antu William Nyalau Badak.
Iya madah, beduduk ari nya, mayuh program udah diperambu kena ngenukuka tetiap sitak menua pesisir enggau ulu entigis masuk program pemansang nya.
“Perintah nengeri enda deka jera ngemansangka semua sitak menua pessir enggau ulu entigis di nengeri tu.
“Nya alai, ketuai perintah Barisan Nasional (BN) semampai chakah gawa ngambika peranak menua pesisir enggau ulu entigis ulih ngasaika semua atur pemansang,” ku iya.
Iya bejaku munyi nya ba Pengerami Betemu enggau Rayat di Rumah Empading, Bunu, dalam pelilih mit Engkilili ditu, apin lama ke udah.
Bisi datai ba pengerami nya Kaban Kunsil Nengeri (ADUN) Engkilili Dr Johnnical Rayong Ngipa.
Nyalau madah, juluk nya deka nyadi nyata enti sema semua rayat ngetanka kaul kerejasama enggau perintah nengeri.
Iya madah, semua proejek pemansang ke diperambu, ukai semina meri penguntung ngagai nengeri tu tang mega ngagai rayat nya empu.
Kelimpah ari nya, iya mega ngansak peranak menua tu kelebih agi diau ba menua pesisir majak nyukung perintah pegai BN Sarawak.
Ku iya, sukung peranak menua tu ngagai BN Sarawak endang beguna amat ngambika sida semampai ngasaika buah pemansang ke benung dipejalai ba serata menua tu.
Kelimpah ari nya, Nyalau ngarapka rayat terus nyukung perintah ngambika semua perambu projek pemansang ulih dipejalaika ba endur diri empu ti tau bendar mai mayuh penguntung ngagai sida.