KUCHING: Komuniti ke diau di kampung ngembuan pengawa ke berat nyadi mata enggau pending Opis Kampung dikena beratika sebarang pengawa salah ke nyadi ba rampa menua tu.
Direktor Opis Kampung Menua Sapuan Ahmad madah, kediatu mayuh tuai-tuai pupu bansa bisi disengkaum enggau pengawa tu ba baruh program renjer jelu babas.
“Datai kediatu, lebih 2,000 Renjer Jelu Babas udah dipadu mantu kitai bejalaika atur nagang pengawa bejualka dagin jelu siga,” ku iya.
Iya madah baka nya lebuh bejaku ba atur pengawa ‘Bengkel Pemantapan Kapasiti Mengenai Inisiatif Pemantauan Hutan di Sarawak’ ti diatur TI-M Forest Governance Integrity (FGI) Project ditu, ensana.
Iya madah, penagwa neritka adat begulai enggau ijinsi mega beguna amat dikena nagang sebarang pengawa salah ba kampung laban nya ke nyadi reta tengkira menua tu.
Ba atur pengawa nya mega, Presiden TI-M Datuk Akhbar Satar madah, sukung komuniti begulai enggau Opis Kampung beguna amat kena beratika sebarang pengawa ke enda manah nyadi ba kampung ke nyadi reta pesaka ngagai nembiak jemah ila.
“Penemu pasal peluang ke manah ba kampung kitai sereta penguntung iya ngagai mensia berat amat kena beratika komuniti mega ulih sama-sama mantu nyaga rampa menua ke nyadi pemisi kitai,” ku iya.