Anda di sini

Kelimpah ari pekara akademik, nembiak sekula patut ngembuan penyiru: Fatimah

Advertisement

NEMBIAK SEKULA PATUT NGEMBUAN PENYIRU: Fatimah (tengah) nerima tikit masuk ngagai produksi muzikal ‘‘Ships Ahoy!: Pirates and Adventure Galore at Lodge School Musical ‘Treasure Island’ ari seiku pelakun ke deka dipandangka kena 25-27 April, di Dewan Tun Ahmad Zaidi Adruce (TAZA) di Institut Pematih Pengajar Batu Lintang. Sama bisi dalam gambar, Kelvin (dua kiba).

KUCHING: Nembiak sekula ukai semina diajar pekara akademik lebuh dalam kelas tang mega patut ngembuan penyiru dalam pendiau besesehari sereta ngayanka pemanah ulah ba orang bukai lebih agi sida ke betapi enggau penusah.

Menteri Pengintu Pengelantang Pendiau, Pekara Orang Indu enggau Pemansang Ruang Bilik (KKWPK), Datuk Fatimah Abdullah madah, nembiak ke dipatih ngembuan ulah ke siru ke orang bukai bisi penyiru dalam ati diri.

“Nya alai, berat endar kitai ngajar anak kitai nengah sistem sekula belajarka penyiru sereta ngembuan ulah ke deka ibuh ke orang bukai, ari kitai tembu kiruhka diri empu.

“Ari perati kitai empu, kitai ukai semina deka meda menua kitai maju dalam fizikal aja tang mega nyengkaum pengawa rama.

“Nya alai, kemaya hari tu kitai beratika bala nembiak rebak baru diatu diajar nyukung pemansang pengawa rama baka tu, ngambika kitai ngembuan komuniti ke bekualiti,” ku Fatimah.

Iya madah baka tu ba aum media maya ngelaluka penatai bala nembiak sereta pengajar ari sekula peribit ‘Lodge School’ ke bisi betemu enggau iya di opis iya di Baitulmakmur bekaul enggau produk muzikal ke deka dibantai bala nembiak Lodge School ‘Ships Ahoy!: ‘Pirates and Adventure Galore at Lodge School Musical ‘Treasure Island’.

Teater muzikal tu deka digaga kena 25-27 April, di Dewan Tun Ahmad Zaidi Adruce (TAZA) di Institut Pematih Pengajar Batu Lintang.

Tikit ngulu teater tu dijual ba rega RM50, RM70 enggau RM100 seiku, lalu asil ke diulih ari tikit tu deka diberi ngagai sebuah gerempung ukai dikuasa Perintah (NGO), Hope Place (betuaika Kelvin Wan) ke deka dikena gerempung tu mantu orang ke tusah di nengeri tu.

Kelimpah ari nya, Fatimah madah, nembiak sekula mega patut diperansang ba pengerindu sida, ambika chunto enti sema bala anak sida  bisi pengerindu ba muzik enggau ajat, sigi patut diperansang.

“Nya alai, pengawa sekula beratika pengerindu nembiak ke belajar ba sekula sida, lalu kemansangka pengerindu nembiak ba pengerindu sida, ukai semina naka ngemansangka pengerindu nembiak tang ari pengerindu nya ngajar nembiak bisi pengarap ba diri,” ku iya.

Iya nandu, pemanah ngemansangka pengerindu nembiak ba pengawa ti dikedeka sida meri penguntung ngagai nembiak nya empu lebih agi lebuh sida badu besekula, laban peneleba ke dipelajar sida ngelama tu, sida iya belajar nyadi orang ke disiplin, pechaya ba pegawa besaup, landik ngatur hari diri dalam sida iya ngereja utai ke dikerindu.

“Nembiak bansa tu ke nyadi rebak ke nyadi modal mensia ke bekualiti ke Sarawak, ke deka nyukung pemansang sereta pengelatang rayat kitai,” ku iya.

Kelimpah ari nya, iya madah dalam pekara bekait enggau NGO baka Hope Place, taja pan di mengeri tang ba KKWPK, pansik ba penanggul baka penyeranta dalam mengeri seruran dikait enggau mensia mayuh ke bepindah ari menua pesisir ngagai mengeri, ke nadai ngembuan sebarang pengelandik, pelajar lalu sida iya diau dalam penyeranta.

“Pemisi orang ke seranta, kurang tauka manggai RM400 tauka RM600. Bakani ku gaya deka nupi bini anak, lebih agi enti anak mayuh. Reti nya per kapita mit endar,” ku iya lalu nambah, penyeranta bansa tu ukai semina nyadi di Kuching aja, tang nyengkaum nengeri bukai.

Nya alai, ku Fatimah, Perintah sigi begunaka NGO mantu sida mantu orang bukai lebih agi ngajar komuniti tu dalam pekara ekonomi, penemu sereta pekara bukai ke deka mai penguntung ngagai sida iya.

“Kami di KKWPK begunaka pemadah baka tu, lalu ari pansik tu, kami nemu bakani bansa bantu ke ulih ditulung kami, nyangka nya pelajar, pengerai, pengelantang pendiau tauka begunaka bantu ari Opis Kandang Menua (PBT),” ku iya.

Sama bisi ngulu aum media nya kemari, Kelvin Wan ari Hope Place enggau direktor produksi muzical sekula Lodge, ‘‘Ships Ahoy!: Pirates and Adventure Galore at Lodge School Musical ‘Treasure Island’, Zakaria Abdul Manan.

Orang mayuh ke deka meli tikit masuk produksi muzikal tu tau betelefon ngagai gerempung sekula Lodge ba lumur 082-363554 tauka 082-362185.

Advertisement