ALBUM KENANG: Artis ESDR maya begambar bebala mayuh enggau peranak Rumah Jan Jelian, Ulu Tau, Anap, Tatau. Sama bisi ayan Tuai Rumah Jan (ngena baju kut).
NGAIT ATI: Bala artis ESDR benung mendingka tebah Gendang Lanjan tauka Gendang Pampat ari peranak rumah panjai.
BINTULU: Keterubah iya Eastern StarDom Record (ESDR) ke bepalan ba Bintulu deka ngeluarka Album Gawai ESDR 2014 ba bulan Mei tu ila.
Pengawa ngaga klipvideo album nya diatur ba Rumah Jan Jelian, Ulu Tau, Anap, Tatau nyerangkung urung 12 iku artis ESDR ke diketuaika Direktor Kanan ESDR Dom Romeo.
Artis-artis ESDR ke bisi enggau ngemujurka album nya ke diatur ari 21 nyentuk ke 23 Mac tu tadi iya nya Dom Romeo, Rosiana Urai, Xavier Meringai, LucyJa, Olivia Peter, John Lerman, Dennis, Olivia Tait, Lyana, Lawson Luat, Flora Bulan enggau Acey.
Ba dalam album tu, ESDR mega bisi mai dua iku penanyi nembiak mit iya nya Flora enggau Acey, seduai diri menyadi.
Ku Penerbit Eksekutif ESDR Kenawang Atong, sepenyampau 11 lagu dirikud dalam album Gawai ESDR serak tu.
Lagu-lagu tu iya nya ‘Pengingat Ensiban Maya Gawai’ (Dom Romeo & LucyJa), ‘Putus Tunang Sebedau Gawai’ (Lyana), ‘Gaga Ati Nyambut Gawai’ (Acey & Flora), ‘Selamat Ari Gawai Dayak’ (koir artis-artis ESDR), ‘Pengerindu Anak Temuai Gawai’ (Xavier Meringai & Olivia Peter), ‘Aram Sama Bebuti’ (Rosiana Urai), ‘Joget Sandau Ari’ (Lawson Luat), ‘Joget Azam Baru’ (John Lerman), ‘Gawai Ngerebah Ke Ranyai’ (LucyJa), ‘Ngarap Ke Ulih Pemisi Gawai’ (Xavier Meringai) enggau ‘Joget Ngelantang Ati Maya Gawai’ (Dennis & Olivia Tait).
“Lagu-lagu tu dikarang beberapa iku komposer ke pegari nama baka Versifier, Dana Daling, Rickson Vincent enggau Gansa Daling.
“Kesemua lagu-lagu dalam album tu berentak ranchak baka joget, poco-poco enggau dangdut sereta engkeman didinga semua serak umur,” ku iya maya dikerandau Utusan Borneo di palan endur ngaga klipvideo nya ba Rumah Jan Jelian, Ulu Tau, Anap, Tatau, apin lama ke udah.
Ditanya nama kebuah ESDR laun mimit ngaga klipvideo Gawai tu enti dibanding enggau kompeni-kompeni bukai di nengeri tu, Kenawang madah, perambu atur projek klipvideo tu endang udah lama tang tejanggal ketegal penanggul ke enda ulih diseliah.
“Taja pia kami andal album Gawai ESDR tu ulih dikeluar ba pasar ambis laun ba bulan Mei tu ila. Kitai ngarapka semua proses ngaga album tu ulih tembu ujung bulan (April) tu ngambika ulih dianjung ngagai piak ke bekaul ngambi dikemendarka sebedau ulih dijual ba pasar,” ku iya.
Bejaku bekaul enggau ESDR, Kenawang madah, ESDR udah ditumbuh ba bulan Januari 2011 ke bepalan di Bintulu.
Sepemanjai timpuh nya nyentuk ke seharitu, ESDR ku iya, udah mujur ngeluarka lapan buah album ari penanyi-penanyi dibaruh perabung iya nyengkaum album Gawai ke deka datai tu.
“ESDR meri besai terima kasih ngagai dua iku penyanding penemu projek album Gawai tu iya nya Luta Kam enggau Gansa Daling.
“Kelimpah ari nya mega kami ngenataika terima kasih besai ngagai peranak di Ulu Anap, Tatau ditu nyengkaum ari Rumah Matu, Rumah Sabang, Rumah Nyandang, Rumah Dilang enggau di Rumah Jan.
“Semua sida tu endang penyukung kuat kami ke udah mantu ngemujurka pengawa ngaga klipvideo Album Gawai ESDR 2014. Enda tinggal mega orang bukai ke sama bisi mantu ngemujurka projek tu, kami meri besai terima kasih.
“Anti meh penatai album Gawai tu ba bulan Mei tu,” ku iya.
Palan endur ngaga klipvideo di Rumah Jan Jelian, Ulu Tau, Anap, Tatau urung empat jam penyauh ari Pasar Tatau nengah jalai kem kayu batang.
ADAT: Tuai Rumah Jan (tengah), Dom Romeo (kiba) sereta ke bukai benung deka ngerujak jani kelai bejadika pengawa ngaga klipvideo Album Gawai ESDR 2014.
ENDA TINGGAL: Sebagi ari klipvideo ke digaga ba tengah laman rumah panjai lebuh artis-artis ESDR bepoco-poco.