KE PENGINGAT: Lo (duduk kiba), Michael (duduk kanan) enggau ke bukai begambar bebala mayuh begulai enggau Adenan, pengudah penemuai basa nya. — Gambar Muhamad Rais Sanusi
Disungkak penemu tebuka ti dikembuan iya, BN dikearap ulih matak mayuh agi sukung maya PRN tu ila
KUCHING: Penelap tauka pementas, adil sereta ngembuan penemu tebuka, sungkak penemu enda bechiping ti dikembuan Kepala Menteri dikearapka ulih matak pemayuh sukung ngagai Barisan Nasional (BN) maya Pengawa Bepilih Nengeri (PRN) ke deka datai.
Pekara nya dipadahka Chairman Kaunsil Kandang Bandar Padawan (MPP), Lo Khere Chiang lebuh dikerandau pengarang berita kemari.
Dulu ari nya Lo enggau 25 iku pengereja pengawa sereta raban kaunsilor MPP meri penemuai basa ngagai Kepala Menteri Tan Sri Datuk Amar Adenan Satem, ba opis di Wisma Bapa Malaysia ditu.
Berindik ari pementas, adil sereta penemu tebuka ti dikembuan Kepala Menteri, raban bansa China mega udah tentu deka pulai baru meri sukung ngagai BN ba pengawa bepilih ila, ku iya.
“Aku arap bendar raban bansa China deka pulai baru meri sukung ngagai perintah BN ba atur Pengawa Bepilih Nengeri ila laban Kepala Menteri kitai ngayanka pementas sereta penyiru, lalu nadai bechiping penemu.
“Nya alai dibaruh iring iya ti engkeman, aku arap bendar raban bansa China di Sarawak deka pulai baru nyukung BN ba pengawa bepilih nengeri ila,” ku iya seraya madah, nya entara pekara ti disebut ngagai Kepala Menteri.
Lo madah ngagai pengarang berita, raban MPP nemuai basa seraya meri pengaga ati ngagai Adenan ti dichirika nyadi Kepala Menteri ti Kelima Sarawak.
Nambahka nya ku iya, ba penemuai basa nya kepala menteri dipadah tauka diterangka bekaul enggau pengawa enggau pekara ti dipejalaika MPP.
“Kami nadai berandauka pasal politik sereta polisi. Kami meri penerang ngagai kepala menteri pasal nama pekara ti dikereja sereta sistem endur pendiau ti dikemeranka.
“Nyerumba tu mega aku bisi nyebut kami temegah ati ngagai iya (Adenan) ketegal dichirika nyadi Kepala Menteri,” ku iya.
Lebuh ditanya sekalika pemuang penuduk sapit chairman MPP deka diisi, Lo madah, pekara nya nadai disebut.
“Baka ke dipadahka aku, kami semina meri penemuai basa ngagai Kepala Menteri, lalu pasal penuduk sapit chairman nadai kena sebut.
“Aku arap bendar bala ketuai nemu bagi sapa pemadu patut mangku penuduk sapit chiarman nya,” ku iya.
Kelimpah ari nya iya madah, MPP temegah ati sereta rindu meda chara Adenan (Kepala Menteri) ngiring menua.
Baka ti diripot dalam surat kabar, Kepala Menteri madah, orang ti ngembuan ulah ekstrim dalam jalai pengarap tauka bansa enda diterima ke nengeri tu.
“Kami amat temegah ati ngagai nya lalu pia mega orang bukai pelaba aku,” ku iya sekali agi madahka rindu meda chara kepala menteri ngiring menua.
Nyempulang Lo meri penemuai basa ngagai Kepala Menteri Tan Sri Adenan Satem iya nya Sekretari MPP Michael Sawing enggau ke bukai.