Anda di sini

PKR enda ngitung penyampau ulih BN: Adenan

Advertisement

PKR ENDA BERATIKA PENYAMPAU UNDI?: Adenan diapit Rundi (kiba) enggau Saidol mandangka statistik pemutus Pengawa Bepilih Mit Balingian ngagai pemberita.

Ukai semina pemayuh undi majoriti nambah ari ke udah,undi ari raban bansa China ngayanka sukung

KUCHING: Pemutus Pengawa Bepilih Mit (PRK) Balingian ke alai Barisan Nasional (BN) Sarawak menang nengah majoriti besai 6,911 undi ngelaika pun ba pengujung parti penyakal di nengeri tu.

Kepala Menteri Tan Sri Datuk Amar Adenan Satem madah, penyakal ke diarika Parti Keadilan Rakyat (PKR) balat alah ba semua empat palan ngundi ke alai penyampau undi ke dikeulih parti penyakal nya ba semua palan muai undi enda ngelui ari 100 iti.

“Pemutus mandangka PKR alah ba semua palan ngundi ke alai parti penyakal nya mega balat alah ba undi pos enggau pengawa ngundi tumu.

“Penyampau undi ti dijapai PKR ba semua palan ngundi enda ngelui ari 100 iti lalu sida semina teulihka seiti undi ari penyampau semua 42 undi pos sereta seiti undi ari penyampau 130 iku orang ti ngundi tumu,” ku iya.

Adenan mansutka jaku tu ba sebengkah aum pengarang berita ke diatur di Wisma Bapa Malaysia, Petra Jaya ditu, kemari.

Iya madah, BN ke diarika chalun ari Parti Pesaka Bumiputera Bersatu (PBB) Yussibnosh Balo teulihka 8,194 undi lalu chalun PKR Abdul Jalil Bujang ke semina teulihka 1,283 undi.

“Penyampau undi ke diulih BN ba pengawa bepilih mit tu nambah 1,984 undi enti dibandingka enggau 6,210 undi ba pengawa bepilih nengeri 2011,’ ku iya.

Ngenang kaul ke sama, Adenan madah, raban orang ngundi bansa China udah pulai nyukung BN lalu terang dipeda ba pemutus pengawa bepilih Hari Enam tu tadi ke alai pelilih ngundi Mukah ti dikuasa penyakal ba pengawa bepilih ke dulu, udah dirampas BN.

“Ba pengawa bepilih ke udah, BN alah ba Mukah tang diatu kitai ukai semina udah nambah penyampau undi ba pelilih nya tang mega mujur ngerampas ari PKR.

“Dua palan endur ngundi dibuka dipelilih Mukah ti tebal agi diuan bansa China ke alai BN teulihka 270 undi lalu PKR 152 undi,” ku iya.

Di palan ngundi Sekolah Chung Hua Kuala Balingian, BN mujur nambah penyampau undi enti dibandingka enggau penyampau ke diulih ba 2011, tandu iya.

Iya netapka BN Sarawak nyapai pemujur besai ba pengawa bepilih Balingian ketegal diarika seiku chalun ti manah sereta asil ari gempung manah semua raban ari serakup parti dalam BN maya bekimpin.

Nimbal tuduh PKR ti madah sida alah tang mujur nambah penyampau undi ti diulih enti dibanding enggau taun 2011, Adenan madah: “PKR enda beratika penyampau undi ti diulih BN ba Balingian. PKR mega nyauka lenyau duit jengkeram”.

Bela bisi ngulu atur pengawa nya kemari Sekretari Besai BN Sarawak Datuk Dr Stephen Rundi enggau Ketuai Sekretari Politik Kepala Menteri Abdullah Saidol.

Advertisement