SRI AMAN: Menteri Muda Pemansang Menua Pesisir enggau Pengawa Berumah Datuk Francis Harden nemu pengidup rayat ba menua pesisir deka berasai lantang enti projek Bekal Elekterik Menua Pesisir (RES) udah tembu enda dipejalaika ila.
Ku iya, perintah Barisan Nasional (BN) udah ngemendarka ungkup belanja RM12 miliun kena ngemujur projek nyendiaka RES ba kandang Jalai Paku, Undop Batu Lintang, Sri Aman.
“RES nya sebengkah projek pemansang ri benung dipejalaika di Sri Aman nyengkaum pengawa ngaga jalai alun, ngaga sepital baru, ngemesaika Pasar Baru Sri Aman enggau sekeda utai bukai.
“Aku arapka rayat nemu BN endang seruran chakah gawa ke rayat. Anang mendingka petenah penyakal ti madahka perintah ke betuaika BN enda mujur ngubah tikas pengidup rayat,” pia ku iya madah ngagai pemberita lebuh ke ninjau pemansang ke nyadi ba kandang menua Sri Aman, ditu kemari.
Harden ke mega Kaban Kunsil Nengeri (ADUN) Simanggang bejalaika pengawa ninjau pemansang nya ngambika iya ulih ngelala penanggul ke ditapi rayat ba sitak ke ari baruh pegai iya, sebedau iya merambu pelin pemansang ke baru kena mutarka penanggul sida.
“Endang batang pengawa aku ke nyadi pengari rayat Barisan Nasional (BN) ninjau gaya pengidup rayat ba DUN Simanggang,” pia ku iya.
Sama bisi nyempulang iya maya nya, Kaunsilor Sawing Sumar enggau pengari Nembiak SUPP Simanggang, Patrick Michael Malajin.