NGASURKA PERAU: Dua iku peranak menua nya benung ngasurka perau lebuh ke nengah Wong Entekai di Sungai Ngemah,Kanowit.
KANOWIT: Batang ai ke mega lalu nyadi jalai besai peranak Sungai Ngemah ti diau ba Nanga Jagau, Lubok Tanjong, Nanga Lakah enggau Rantau Lugai balat endar langkang, laban kemarau panjai dalam kandang dua bulan ke udah.
Ngelui 2,000 iku mensia ke nguan kandang menua nya, nadai chara bukai kelimpah ari nepan perau panjai nengah Sungai Ngemah bejalaika pengawa sida enda ngira maya kenyau ari kelia menya.
Penanggul ke ditapi sida diatu (musin kemarau) iya nya ai sungai mabu, kayu tumbang sereta melintang ba sungai enggau wong ke mabu lalu mar ditengah sereta tau ngenataika penusah.
Ku seiku ke deriba injin sepit ngena perau panjai ari Rantau Lugai ke dikelala enggau nama Nyangguh, 48, mantaika sebana ngagai Utusan Borneo empai lama ke udah madahka,iya berasai irau ati enti sema bisi penusah ngenyit nyadi di rumah panjai, laban ngelui 10 jam pejalai baru sangkai di pasar Kanowit nepan perau panjai.
“Kelimpah ari bebatakka perau ba ai ke mabu sepemanjai sungai nya, kami mega bebatakka perau mansa beberapa iti wong ti mar ditengah sereta tau ngenataika penusah bebadi ngagai kami,” ku Nyangguh.
Wong ke ditengah sida sepemanjai Sungai Ngemah nya baka Wong Entekai, Wong Memaloh (semak Nanga Jagau), Wong Silau, Wong Tarik Ili, Wong Aris, Wong Tibang, Wong Empeliau enggau mayuh agi wong bukai.
Semua wong nya mar ditengah sereta tau ngenataika penusah ngagai orang ti nengah sungai Ngemah, ku iya.
Seiku agi peranak menua ti dikelala enggau nama Nyala, 75, madahka sida udah teleba betapi enggau penanggul nya, sekalika maya musin kemarau ke panjai tauka maya bah besai.
“Kami semina besampika pengelikun diri lebuh ke nepan perau sepemanjai ai, betengahka wong ti tau ngataika penusah ngagai kami,” ku iya.
Lebuh ke ngenang sentang pemansang ba kandang menua nya, seiku agi peranak menua nya, Anchar Bantin, 56, madahka sida jauh endar tinggal ari pemansang.
“Kami tinggal ari pemansang perengkaguna baka jalai alun, karan enggau ai beresi kenyau ari kelia.
“Kami dekaka jalai alun, kami minta pengari rayat ngemerat sereta berundingka penusah ti ditapi kami. Kami mega minta Kepala Menteri enggau Menteri Besai ngabas kandang menua kami di Sungai Ngemah,ngambika tikas pengidup kami berubah ari ke sebedau tu,” pia ku seiku peranak menua ari Nanga Lakah, ke nama iya enggai dibantaika ditu.
Perambu ngaga jalai alun ari Nanga Ngungun ke Nanga Jagau ti nyauh urung 17 Kilometer sereta beungkus RM8 miliun, udah disebut Menteri Besai ba mua mayuh lebuh iya nemuai ke Nanga Tada dalam taun 2010 suba.
Taja pia, nyentuk ke diatu pekara nya nadai didinga rita agi. Peranak menua Ngemah amat ngarapka perintah ngenyampatka agi pengawa ngaga jalai ari Nanga Ngungun/Nanga Jagau nyentuk ke Rantau Lugai.
SAMA BESAUP: Besaup matak perau lebuh ke nengah Wong Memaloh di Sungai Ngemah, Kanowit.