SIBU: Gerempung Ukai Dikuasa Perintah (NGO) bejalaika tanggungpengawa nyadi penyambung entara perintah enggau rayat.
Kaban Kunsil Nengeri (ADUN) Ngemah, Alexander Vincent madah, NGO ditumbuh ukai semina bejalaika tanggungpengawa ngemataka kaban sereta ngatur pengawa aja, tang begempung enggau perintah ngambi pulaika pemaik ngagai kaban gerempung enggau rayat.
“NGO mega ulih mantu ngemujurka agenda enggau polisi perintah.
“Ukai reti NGO nya gerempung politik, tang dikearap bejalaika tanggungpengawa ke tau mai penguntung ngagai semua,” pia ku iya bejaku ba Program Info Bestari Komuniti 1Malaysia (K1M) di Bawan enggau Tada, Kanowit ditu.
Sama bisi ngulu pengerami nya, Pemesai Opis Penerang Pelilih Mit Kanowit Wan Mohd Zuki Wan Ismail, Chairman K1M Bawan Kaunsilor Stephen Chendang, Chairman K1M Tada Kaunsilor Bunut Kubu, Pengulu Barnabas Angkis, Pengulu Ugap Seribu, Pengulu Juni Masam, Pengulu Ijam Tuah engagu bala temuai bukai.
Alexander mega meransang semua nyengkaum ketuai raban bansa ngambika begempung enggau perintah.
“Kelimpah ari NGO, ketuai raban bansa mega patut sejalai enggau perintah bejalaika pengawa mantu rayat. Ulah ke baka nya beguna amat kena ngenegapka penyerakup entara perintah enggau rayat,” ku iya.
Iya mega meransang bala ketuai raban bansa meri penerang ti bekaul bekaul enggau pekara ke nyadi diatu sereta agenda perintah ngagai rayat nengah chara ke betul.
Ku iya, nengah chara ngemeran ulah ke begempung napi sebarang pekara, penyerakup enggau kualiti idup nyadi besai agi reti.
“Aku ke nyadi pengari rayat di Ngemah, semampai deka nyukung semua atur pengawa ti diatur K1M tauka NGO bukai. Kelimpah ari nya,aku nguji ngawakka diri ngulu program ke diatur laban deka meransang seraya ngenyemakka diri enggau rayat,” ku iya.
Alexander mega ngenukuka perintah deka majak ngemerat sereta meri pemansang ngagai menua pesisir.
Program nya mega disempulang enggau Pengerami Gaga Ati ke bala Kaunsilor Majlis Daerah Kanowit (MDK), ti empai lama udah dipadu mangku pengawa sida.