KENUKUKA PEMERAT DULU: Sapit Menteri MDTCC Datuk Seri Ahmad Bashah Md Hanipah (kanan ) meresa pemerat manuk maya ke ngelawa Makit Sentral Sibu.
BETUL DACHIN TU?: Pemesai MDTCC meresa dachin ngenukuka timbang nya endang amat.
SIBU: Mensia mayuh ditu udah belabuh bekenaka dua bansa dachin penimbang ke dibekalka Metrology Corporation (MCM) Sdn Bhd ba Makit Sentral Sibu.
Tu bepelasarka tinjau ke digaga tiga bengkah gerempung pedaja di makit ditu.
Chairman Gerempung Makit Sentral Sibu Hii Ing Ching beratika antara 30 enggau 40 iku orang ke bebeli nguna dachin nya ninting hari .
“Aku beratika orang ke bebeli nya manding pemerat barang lebuh bebelika ikan, manuk enggau produk bukai ,” ku Hii ngerandau The Borneo Post ensana .
Iya ditanya bekaul enggau timbal ari mensia mayuh ba pekara ngena dachin ke disediaka dia.
Ku iya timbal ari mensia mayuh nya manah bendar berindik ari bengkah program ke diatur Opis Menteri Dagang , Koperasi enggau Pekara Bebeli Barang (MDTCC).
“Aku pechaya seraya orang ke landik bebeli enggai diakal pedaja ,”ku iya.
Dua iti dachin penimbang diengkah ba kaunter sekuriti ba makit lalu tau dipenggau sebarang aya.
Jejaga endang bisi dia ngambika dachin nya enda dirusak bala orang ke enda mereti.
Ku Chairman Gerempung Pedaja Makit Sentral Sibu Yiing Chung Ming madahka orang ke bebeli nya deka nguna dachin enti sida bisi ati ke besangka.
Iya muji piak ke bekuasa ke udah bebendar nyaga bala orang ke bebelika barang.
Seraya nya mandal kepala MDTCC pampang Sibu Ganda Jirap madahka sida udah ngambi atur enam bengkah kes ba orang ke salah ngelaban Akta Timbang dan Sukat 1972 taun nyin tadi .
Ganda madahka sida mega udah ngerampas barang berega RM1,631.70 Orang mayuh ulih betelefon ngagai opis menteri nya nengah lumur 084-335622 tauka 084-329202 enti bisi meda pekara dagang ke enda betul.