Anda di sini

Baru: Taja alah rayat meretika juluk PKR

Advertisement

PRK di Balingian nyadi pengemun PKR ngentap diri ba sitak PBB maya PRN ila

MIRI: PKR arap endar ati ulih tama ngagai sitak Parti Pesaka Bumiputera (PBB) sereta menang ba sekeda sitak sida ba Pengawa Pepilih Kunsil Nengeri (PRN) dudi tu ila.

Ketuai PKR Sarawak Baru Bian madah, pemutus ba pengawa bepilih mit Balingian mandangka sukung bisi nambah 50 peratus ngagai chalun PKR, Abdul Jalil, ti ngujungka iya enda lenyau duit jengkeram baka ti dikedekaka BN maya ke bekimpin.

“Pengawa Bepilih Mit (PRK) Balingian tu pengemun ke  PKR kena nyapai juluk ngulihka sekeda penuduk ari PBB ba Pengawa Bepilih Kunsil Nengeri ti disadang diatur dalam taun 2016,” ku Baru lebuh ke dikerandau pemberita kemari.

Ku Baru, PKR diatu deka ngansak namaka diri ngagai kubu kuat PBB nyengkaum sitak Balingian laban kuing parti nya udah ditemu rayat.

Ku iya, PKR tetap menang taja pan chalun parti nya alah ba sitak Balingian laban sukung ari mensia mayuh majak nambah.

Baru ke mega Kaban Kunsil Nengeri (ADUN) sitak Ba’ Kelalan madah, PKR diatu chakah gawa ba sitak menua pesisir di menua tu, lalu bepanggai ba rayat beratika tuju pengawa ti dikereja sida.

Ku iya, juluk PKR diatu deka chakah agi gawa sereta madahka rayat, PR nya patut dipilih nyadi perintah laban sida nyadi champian mutarka penanggul rayat di menua tu.

Ba Pengawa Bepilih Mit Balingian ku iya, PKR menang ba dua bengkah pekara iya nya, sukung majak nambah enggau jengkeram chalun parti nya enda lenyau.

PKR arapka BN nitihka jaku semaya sida lebuh ke bekimpin kena ngulihka sukung ari rayat, ku iya.

Advertisement