Anwar Ibrahim dikemendar tama kitu ngambika ulih nyeliah petenah penemu ari piak raban antarabansa
KUCHING: Perintah ngemendar ketuai Parti Keadilan Rakyat (PKR) Datuk Seri Anwar Ibrahim tama ke Sarawak rambau Pengawa Bepilih Mit (PRK) Balingian ketegal nyeliah tuduh penemu ba piak raban antarabansa.
Netapka pemutus nya, Kepala Menteri Tan Sri Datuk Amar Adenan Satem madah “Perintah ngemendar ke Anwar tama ketegal kitai enda sekali rawan ke iya”.
Iya nambah, ketuai PKR nya diakun enda ulih nyaup PKR ke alai parti penyakal nyauka lenyau duit jengkeram ba pengawa bepilih mit (PRK) nya.
“Kitai ngemendarka Anwar Ibrahim tama ketegal enggaika kitai kena pangka ba kaul antarabangsa.
“Taja pan iya datai rambau pengawa bepilih tu tadi, PKR ti nyauka lenyau duit jengkeram mandangka tikas pengulih pengawa ti dikereja iya di Balingian,” ku iya ba sebengkah aum pengarang berita di Wisma Bapa Malaysia, kemari.
Ngenang senentang pengawa imigresyen, Adenan madah, perintah endang bisi rintai nama orang ti ditagang tama ke Sarawak ke dikumbai ‘the persona non grata’ ke alai rintai nama nya deka seruran dipansik belama.
Nyaut tanya pemberita, iya madah, ketuai Perkasa Ibrahim Ali engka udah bisi tama ke nengeri tu, tang iya enda ulih nyamin sekalika Ibrahim ulih tama ke nengeri tu baru jemah ila.
“Sekalika Ibrahim Ali bisi di nengeri tu ukai nyadi pekara ti deka dipejurai maya ke diatu. Iya engka bisi tama, udah nya pansut. Kitai deka beratika pekara tu enggau silik enti iya bisi datai ke Sarawak jemah,” ku iya.
Dua iku ketuai PKR ke bukai iya nya mandal chairman Chua Tian Chang enggau ketuai orang Indu Zuraida Kamarudin ditagang tama ke nengeri tu rambau Pengawa Bepilih Mit Balingian tu tadi.
Adenan netap: “Aku enda ulih meri kebuah. Semua pemutus dilempai ngagai sekretari nengeri.”