SIBU: Tuai Rumah (TR) Catherine Tamoh enda mudah asa ati seagi nadai pengamat ti ngenukuka bilun MH370 nya lenyau, ke alai anak iya seiku ari 239 iku orang dalam bilun nya.
Anak TR Catherine, Andrew Nari, ketuai kelasi dalam bilun maya penerebai ari Kuala Lumpur nuju Beijing, lesap ari radar lebuh ke benung dalam pejalai, kena 8 March tu tadi.
“Aku mengkang ngarap sereta besembiang belama ke anak aku enggau semua orang dalam bilun nya. Aku besembiang sereta ngarapka berita ke manah,” pia ku iya madah ngagai The Sundaypost ensanus.
Enggau ati ti sinu, iya madahka diri mengkang di Kuala Lumpur.
Iya berangkat ke Kuala Lumpur kena 8 March, nyempulang bini Andrew din nyentuk ke diatu.
“Kami mengkang nganti diterebai ke Australia enti sida bisi nemu berita ke pemadu baru pasal nya,” ku iya seraya madahka diri enggai ngenang pasal nya panjai agi.
Berebak enggau nya, peranak Rh Catherine Tamoh madahka Andrew nya seiku orang ke nyamai enggau begulai sereta mentas ati.
Christina Anisah, 60, sekali petungal enggau Catherine madah, Andrew nadai kala enda mulaika diri ke rumah panjai enti maya ngintu Gawai Dayak enggau Krismas.
Christine Sebai, 60, petunggal Andrew madah, ke penudi endar iya betemu enggau Andrew maya ngintu Gawai Antu kena bulan Disember taun nyin tadi.
Seiku agi kaban iya, Christina Tadon, 49 madahka Andrew ngembuan kaul ke manah enggau sida serumah.
Ku iya, lebuh Andrew pulai iya semampai bisi mai chokelit nyadika pemeri ninting kali iya datai ari menua tasik.
Andrew ada kena bulan Februari taun 1965, sereta udah gawa enggau MAS kenyau ari bulan September taun 1989.
Iya mega anak tuai endar ke sida empat iku menyadi.
Diatu iya diau di Puchong enggau bini iya sereta dua iku anak.