SIBU: Raban Boys’ Brigade Gereja Methodist Masland Kompeni Ke-6 Sibu gagit bendar ati bisi diberi awak ngelawa muzium mini di Sibu Heritage Centre.
Peluang tu sida ulih meda urung 100 bengkah keresa asal bansa Melanau ke dipandang dibai ari Mukah.
Menijar Dewan Suarah Sibu Ling Muk Jii meri jaku gerah ngagai bala ke beraban 50 iku maya sida ngelawa muzium nya.
Seraya nya, Ling madah ngagai bala pemberita sekeda keresa dipindah kin kitu pengudah muzium mini nya ditutut.
Muzium mini nya dalam Dewan Suarah Mukah.
“Keresa lebih ari 100 semua nya nyelai laban guna sejarah lalu nadai dipeda ba endur bukai. Keresa nya bisi kaul enggau pengidup bansa Melanau,” ku iya.
Keresa nya nyengkaum perau kayu, seramik, sengkalan, rengka dikena ngulihka manta, ukir kayu enggau ke bukai, tambah iya.
Ling ngarapka enggau penambah keresa ke dipandang deka nambahka penyampau bala temuai datai kia.
Pemantu muzium mini Joachim Tajul nerangka raban bansa Melanau ke diau ba kandang menua pesisir pantai tebal agi sida nya ngemeran pengawa berikan.
“Keba sida ngaga perau maya Pesta Kaul dikena beterimakasih ngagai petara setegal pemayuh berekat ari tasik,” ku Joachim nerangka asal kebuah bisi perau.
Ba sentang ‘Dakan’ tauka ukir kayu, nya dikena orang kelia berubat.
Nya ujung iya, Joachim nyebut pemandang tambah nya ila deka matak mayuh agi temuai datai kia.
Dulu ari nya, ku Ling ke madah sida ngena tiga buah van dikena beangkutka keresa nya kitu ari Mukah.
Seraya nya muzium tu udah alai nyimpan lebih ari 1,000 bengkah keresa sejarah, nyengkaum kebuk lama, pinggai mangkuk, gambar jeman koloni, timpuh jepun, pegai Brooke enggau ke bukai.
Muzium mini nya udah matak mensia mayuh datai kenyau ke udah dipindah ari Dewan Suarah beberapa taun ke udah.