KUCHING: DAP Sarawak deka milih ketuai ari bansa Dayak nyadi chalun Kepala Menteri enti parti diberi mandat numbuhka perintah Pakatan.
Chairman DAP Nengeri Chong Chieng Jen madah parti udah netapka pemutus nyiri seiku ketuai bansa Dayak nyadi Kepala Menteri pengudah beratika Barisan Nasional (BN) enda ngenahka sekeda pekara enggau adil ngelamatu.
“Bisi sebengkah sempekat dipesetuju maya numbuhka Malaysia enggau maya Sarawak teulihka kuasa merintah diri. Sempekat netapka enti gabenor Sarawak bansa Melayu, Kepala Menteri patut bansa Dayak.
Tang ngelamatu, sempekat udah enda dikeibuh, enda dikeingat sereta dibuai BN,” ku iya bejaku ngagai pemberita pengudah ngulu aum komiti parti nengeri ba Indu Opis DAP ditu, kemari.
Sebengkah agi kebuah parti netapka resolusyen iya nya ketegal pengawa nyiri Tan Sri Datuk Amar Adenan Satem nyadi Kepala Menteri pengudah Pehin Sri Abdul Taib Mahmud ngelengka pangku pengawa.
“Enti nitihka protokol, Sapit Kepala Menteri patut niki nyadi Kepala Menteri tang pekara ke nyadi bedau lama tu tadi jauh ngelimpang ari ke patut ti alai Sapit Kepala Menteri enda dirintai nyadi chalun ngisi penuduk nya.
“Aku ngasai, sekali pan nuan rinduka iya tauka enda, pangku pengawa iya ke nyadi Sapit Kepala Menteri patut dipebasa,” ku Chong.
Berindik ari nya, Chong meratika pekara nya terang mandangka bansa Dayak udah enda dipebasa ketegal penuduk Sapit Kepala Menteri bebansa Iban nya enda diperunding lebuh milih pematut nitih protokol nyadi Kepala Menteri.
“Enda ngerintai nama Sapit Kepala Menteri nyadi seiku chalun nyadi Kepala Menteri terang dipeda enda bebasa sereta ngemalu ke iya,” tandu chong.
Ngenang ulah BN ti udah ngemelakangka komuniti Dayak, Chong ngasai pekara nya patut dipelurus diatu lalu chara ke pemadu engkeman iya nya nengah atur nyiri ketuai ari bansa Dayak nyadi Kepala Menteri ke mega ketegal ti nyadi bansa ti ngembuan tubuh pemadu mayuh di nengeri tu.
“Nambah pemedis nya, Dayak mega udah enda dipeduli ba nengeri tu lalu enggau kebuah nya kitai meri jamin ngagai komuniti Dayak, enti DAP numbuhka perintah Pakatan, chalun kepala menteri ari DAP sigi ari raban bansa dayak,” ku iya.
“Nuan tau ngumbai pemutus tu nyadi sebengkah chara dikena meli undi tang tu meh resolusyen enggau semaya ungkup komuniti Dayak, tandu iya.