SRI AMAN: Menteri Muda Pemansang Menua Pesisir enggau Pengawa Berumah, Datuk Francis Harden Hollis madah, rayat ke diau di Ulu Paku, Undop Batu Lintang deka bisi kuasa Karan Menua Pesisir (RES) ke beungkus RM12 juta enda lama lagi.
Ku iya, rayat ba kandang menua nya patut meri kerejasama penuh lebuh projek nya dipejalaika ila.
Pemujur projek nya dipejalaika, bepanggai ba kerejasama ke diberi semua peranak menua nya, ku iya.
“Enti projek RES nya udah tembu ila, nya deka ngenyamaika semilan buah rumah panjai enggau sebuah sekula dalam kandang menua nya,” ku iya.
Harden bejaku munyi tu lebuh bejadika Pengerami Gaga Ati ke Kaunsilor Tr Sawing Sumar ti dichiri nyadi mandal Chairman Kaban Kunsil Pelilih Sri Aman (MDSA) di Rumah Panjai Ulu Paku, Undop, ditu, kemari.
Harden ke mega Kaban Kunsil Nengeri (ADUN) Simanggang madah, projek RES ke sebaka ti beungkus RM9 juta mega deka diasaika perasak menua di Nanga Skrang, Engkilili.
“Pengawa bejalaika projek RES di Ulu Paku enggau Nanga Skrang nya ulih puntan enti sema bisi orang datai kia sereta nyaruka runding peranak menua nya bekaul enggau tanah ke dikena ngaga projek nya.
“Kemeratka pengidup kita dudi ila enggau pemansang pengidup kita. Beri meh penuh kerejasama ngagai pemaju ngambika projek RES nya ulih ngubah tikas pengidup kita dudi ila ,” ku iya.
Bela bisi ngulu pengerami nya, Pengulu Michael John Sanggup, Ketuai Nembiak SUPP Simanggang, Patrick Michael Malajin enggau bala kaban MDSA baka Kaunsilor Waterkiller James Junit, Kaunsilor Daniel Sawing enggau Kaunsilor Ander.