GENAP 10 TAUN: Lima ari kanan – Pillai, Kilat, Nait, Jimbun,Senorita sereta temuai bukai begulai nyirap kek 10 taun penumbuh SDNU pampang Taman Boulder Built ditu malam ensanus.
KUCHING: Senyata ti pemadu bisa maya nyikap diri betapi enggau dunya ti nadai adan iya nya penengkeman bengkah kembuan sereta penigggi pelajar ba seseiku mensia.
Berindik ari nya, Menteri Kanan ke mega Menteri Pemansang Rama Tan Sri William Mawan madah, pekara pelajar deka majak dikemerat ke alai raban nembiak baru diperansang bebendar ngulihka pemandai sereta pengelandik.
“Pekara pelajar endang patut dikemansang sereta dikemerat dikena kitai ngatur pendiau diri lebih agi maya napi pemar dunya baka ke diatu.
“Ba dunya ke nadai adan, kitai begunaka pemandai enggau pengelandik ngambika ulih nempuh pemar sereta tetitihka singkang orang ke udah mujur dalam pengidup,” ku iya.
Iya mansutka jaku munyi tu ba sebengkah atur bejadika pengawa beserumpu Makai Lemai nyerumba 10 taun Gerempung Bansa Dayak Sarawak (SDNU) pampang Taman Boulder Built udah ditumbuh ke alai pesan Mawan dikenataika Sekretari Besai SDNU Kilat Beriak ngarika iya nyadi temuai pemadu dipebasa.
Pengerami nya diatur di Palan Keristin Ekumenikal lalu digulu enda kurang ari 800 iku kaban sereta temuai bukai malam ensanus.
Meretika guna pelajar, Mawan ke mega chairman SDNU ngansak gerempung nya ngatur kerejasama enggau Serakup Graduet Dayak Sarawak (SDGA) bejalaika pengawa ngemansang pekara pelajar ngagai raban nembiak.
“Kededua gerempung ti ngarika bansa Dayak tu patut segulai sejalai nyendiaka program ti tau ngangkatka tikas pelajar raban nembiak,”ku iya.
Muji pengawa manah SDNU pampang Taman Boulder Built ti meri insentif ngagai raban nembiak ti nyulut ba peresa, UPSR, SPM enggau STPM, Mawan netapka pengawa nya tau meri peransang ngagai nembiak ngambika bebendar agi belajar.
PERANSANG PELAJAR: Kilat (dua kiba) nyuaka insentif ngagai seiku nembiak ke nyulut
ba peresa perintah maya pengerami malam nya. Bela ngemata Nait (kiba) enggau Pillai.
Kelimpah ari ngemansangka pekara pelajar, SDNU mega megai tanggungpengawa ngerembaika adat enggau main asal Dayak lalu dipeturun ngagai nembiak rebak baru, tandu Mawan.
Ba pengerami nya Mawan ngagihka RM20,000 ngagai SDNU pampang Taman Boulder Built dikena bejalaika pengawa pelajar sereta rama bukai.
Bela datai chairman SDNU pampang Taman Boulder Built John Pillai Rujis, chairman pengatur pengerami Dato Dr Anthony Nait Mani, penyanding penemu TR Spencer Birai, presiden SDGA Dr Dusit Jaul, Temenggung Datuk James Jimbun Pungga sereta bini iya Datin Senorita Linang.