Anda di sini

Kenyau ari taun 2001 suba sida meruan sabar nganti

Advertisement

JULAU: Urung 3,000 iku peranak menua ari Ulu Kanowit enggau Sungai Mujok ditu, mengkang arapka projek ngaga jalai alun ti disemayaka perintah ngelama tu ulih dipejalaika enggau lengkas.

Seiku peranak menua nya, Julin Gani, 41, madah, peranak menua nya ngasaika pemar laban nadai jalai alun kelebih agi ungkus pengidup ke majak besai belama.

“Ba kandang menua tu bisi 14 buah rumah panjai sereta 4 buah sekula primari ke bepanggai ba perengka pengangkut ai, ketegal nadai jalai alun.

“Enti deka ngagai rumah panjai ba ulu ari tu, iya nya ba Rantau Limau di Sungai Kanowit enggau Lepong Bilat di Sungai Mujok, nepan perau enda  kurang ari enam jam.

“Nya enti ai maya nya manah. Enti maya kemarau tauka bah, ari ulu nya undur ke pasar Julau, sida berambunka nyawa urung 8 jam, baru nyangkaika diri ba endur ke dituju,” ku Julin berandau enggau pengarang berita nusui penanggul ke ditapi peranak menua nya.

Ku iya, ngelama tu peranak menua nya ukai semina ngasaika diri nadai jalai aja, tang betapi enggau penanggul bukai baka nadai karan, ai beresi enggau perengkaguna bukai.

“Ari segi ungkus ngena perau, ba runding aku besai agi ari perengka pengangkut darat.

“Ambika chunto, ari ulu entigis baka Rantau Limau di Sungai Kanowit enggau Lepong Bilat di Sungai Mujok, ungkus belanja seiku enti undur ke pasar Julau urung RM300.

“Nya nyengkaum ungkus minyak injin sepit, makai enggau palan endur bemalam laban sida enda ulih pulai hari ketegal kelalau jauh,” ku Julin.

Ku Jalin baru, dalam kandang beberapa taun ke udah, pengawa deka ngaga jalai ke ulu udah diperundingka.

“Kena bulan September 2001, Kepala Menteri Sarawak ke sebedau tu, Pehin Sri Haji Abdul Taib Mahmud kala ngungkupka belanja RM1 milliun kena bejalaika pengawa ngerinstis ungkup perambu ngaga Jalai ke Nanga Entabai/Rantau Limau.

“Nangkanka  nya, maya pengawa bepilih besai ke-12 (PRU12), Menteri Pemansang Menua Pesisir enggau Pelilih Menua, Dato Sri Haji Shafie Apdal ba Rumah Enggu, Rantau Mengilas Entabai, Julau udah nasih tanah kena projek ngaga jalai nya.

“Taja pia, dalam kandang beberapa taun tu, jalai ke dianti peranak menua tu lalu nadai didinga berita,” ku Jalin mantaika pengasa ati iya.

Seiku pangan Jalin, Jok Merayang, 50, madah, peranak menua dia tebal agi ngemeranka pengawa bumai enggau bekebun.

“Tebal agi sida tu gawa nangkal getah sereta nanam lada, kena ngulihka belanja.

“Taja pan pengidup kami mayuh pengurang, tang kami mengkang ngarapka jalai alun nya ulih ngemuntangka pejalai kami sereta mai pemansang bukai, ngambika kami enda terus tinggal ari arus pemansang ti udah diasai sekumbang menua tu udah merintah diri,” ku Jok.

Advertisement