SIBU: Jalai Bekakap/Sungai Melanggan ke penyauh enam kilometer ti tembu dikemanahka dalam bulan November 2013, deka meri pengelantang ngagai peranak menua ari tiga buah rumah panjai di Sungai Melanggan enggau Sungai Apong.
Menteri Wang Kedua, Dato Sri Wong Soon Koh madah, jalai alun nya ngemudahka peranak menua di Sungai Melanggan, Sungai Apong enggau Tanjung Bekakap nurun ke pasar Sibu.
“Jalai alun ke digaga nya mantu ngemajuka tanah sepemanjai Jalai Bekakap/Sungai Melanggan lebih agi ba pengawa betanam betupi,” ku iya lebuh bejadika Jalai Bekakap/Sungai Melanggan, ditu kemari.
Bela bisi ngulu pengerami nya, Sekretari Politik Kepala Menteri Andrew Shilling enggau Pau Kiew Chuang, Sapit Chairman Opis Kaunsil Pelilih Menua Pesisir Sibu (MDLBS) Oliver Kuo, Pemancha Stanley Geramong, Tuai Rumah Unjah Besh enggau bala bukai.
Wong ke mega Menteri Kandang Menua enggau Pemansang Mensia Mayuh madah, jalai alun nya kelai perintah Barisan Nasional(BN)meri terima kasih ngagai sukung ari kandang menua nya ngelama tu.
“Tu kelai terima kasih ari perintah ngagai semua ke udah meri sukung penuh maya Pengawa Bepilih Kunsil Nengeri ke sebedau tu,” ku iya.
Iya ke mega Kaban Kunsil Nengeri (ADUN) Bawang Assan ngarapka peranak menua nya terus meri sukung ngagai perintah, laban semina perintah BN aja ke ulih meri pemansang ngagai peranak di menua pesisir.
Nengah awak nya, Unjah meri terima ngagai perintah laban ke udah ngemanahka jalai nya ti beungkus urung RM1.2 miliun.
“Tu mandangka perintah BN semampai ingatka peranak menua pesisir,” ku iya seraya madah, sebedau tu jalai nya mayuh lubang sereta ampuh bah enti maya musin pengujan.
Tuai rumah ari Sungai Melanggan mega madahka, Jalai Bekakap/Sungai Melanggan nya kelai pengaga ati perintah enggau pengari rayat ba sitak nya.
“Pengawa bejadika Jalai Bekakap/Sungai Melanggan nya mega kena nampal mulut penyakal ba sitak nya,” ku Unjah.