KUCHING: Urung 500 nembiak ari bemacham gerempung dipelabaka datai ngerichah atur pengawa ‘MeetUpKch’ ti deka diatur dalam kandang dua hari belabuh ari Hari Enam tu (29 Mac) di Le Park, Dewan Suarah ditu.
Direktor Operasyen Hands on the Crown (HAC) Management, Hanne Saran madah, atur pengawa bekomuniti nya digaga ngenataika pesan rampa pendiau ke likun alai nembiak ulih begulai enggau pangan diri, berandau sereta ngangkatka pengerindu diri ba pengawa dikerinduka sida iya.
“Atur pengawa ujung minggu tu deka beratika penyereta ari sitak menua tu empu datai ari sekula, universiti enggau kolej nyendiaka peluang ke nembiak ari bemacham pendiau ngambika sida iya ulih berandau sereta begulai enggau pangan diri,” ku iya madah ba aum media ditu, kemari.
Iya madah, karnival nembiak ti diatur Hands on the Crown (HAC) Management lalu disukung ouryouth.my, Conquerors Wawasan Sdn Bhd enggau Kuching Street Workout deka beratika sida ke landik merindang ba Konset Earth Hour enggau Konset MeetUpKch.
“Kami deka mantaika tukang pemerindang ke mayuh endar pengelandik baka Sonaone enggau DJ Biggie ba Konset MeetUpKch, hari Minggu tu,” ku iya.
Antara tukang pemerindang hari keterubah nya ila, Ryn ari Yoyo Blitz, Skyrockets, Soulcathez, Heroine, REZ ari Spotlight, Uding Luhat, Swaiv enggau Cariee, Drumcall Community, Moonlight, AiSi enggau DJ Dzul.
Nangkan hari siti, konset nya deka diperindang Sonaone enggau Dj Biggie, Koir Lim Kok Wing, Silwayd, SHGM, Century Music, Wings of Aerelia, Love Comes, Sree Siva Puthiren Urumee Melam, Jejak Biru, Happily Ever After, Stepholic enggau DJ Ladyganz.
Atur pengawa ke deka belabuh digaga ari pukul 9 pagi nyentuk ke 11 malam nya deka mantaika pekit main futsal, pengawa pemandang akustik, pekit main bola keranjang, pasar lambak, bejualka pemakai, kimpin nyali darah, pengawa pemandang kerita klasik enggau konset Earth Hour.
Hari siti (Hari Minggu), raun kedua pekit main futsal deka dipejadika, kelimpah ari pengawa pemandang akustik, pasar lambak, kedai bejualka pemakai, MeetUpKch gig enggau konset MeetUpKch.
Sida ke deka ngerijista diri empu ba pekit main futsal diatu dibuka lalu semina mayar RM150 siti tim.
Pekit nya deka nyendiaka perais mata duit RM1,000 (champian), lalu kedua enggau ketiga deka nerima RM800 enggau RM500.
Atur pengawa nya mega deka muka peluang ngagai mensia mayuh ke diau di genturung mengeri tu muka pasar lambak sereta kedai bejualka pemakai lalu semina mayar suwa RM100 aja sebuah bansal.
Mensia mayuh ke deka datai ngagai ‘MeetUpKch ‘ diberi pechuma lalu pengatur pengawa tu ngelaluka mensia mayuh ngagai atur pengawa tu.
Sida ke deka nemu atur pengawa tu enggau silik agi, tau nelefon ngagai lumur 013-8680651 (Hanne) tauka e-mel saran.hanne@ yahoo.com tauka ngelawa laman Facebook sida iya di www.facebook.com/meetupkch