Anda di sini

Projek ngemesaika palan meresi ai Bayai tembu 80%

Advertisement

Tu ila ulih nyendia sereta tetangkupka peminta guna bekal ai beresi ngagai 60,000 peranak di Sri Aman

SRI AMAN: Menteri Muda Pemansang Menua Pesisir enggau Pengawa Berumah Datuk Francis Harden Hollis madahka projek ngemanahka agi Palan Meresi Ai Bayai ditu, diatu udah manggai 80 peratus (%) tembu.

Nitihku iya, laluh 20 peratus bekaul enggau pengawa nyambung elektrik enggau mekanikal sereta dipelabaka tembu magang bulan Jun ke deka datai.

“Enti udah tembu ila, Loji Perawatan Air Bayai berega RM43 juta tu ulih nyendiaka ai beresi sepenyampau tauka kapasiti 33 juta liter sehari (MLD) dibandingka enggau kapasiti ke diatu 13 MLD.

“Tu ila ulih nyendiaka sereta tetangkupka peminta guna bekal ai beresi sepemayuh 60,000 iku orang kelimpah peminta tambah ari peranak Sri Aman jemah ila,” ku iya.

Harden ti mega nyadi Kaban Kunsil Nengeri (ADUN) Simanggang madahka pekara nya lebuh dikerandau pengarang berita ba Program Nemuai ke Loji Perawatan Air Bayai begulai enggau ketuai raban bansa ditu, kemari.

Nambahka nya iya madahka, perintah Barisan Nasional (BN) udah ngemendarka ungkup belanja sepenyampau RM2 juta dikena nukar paip AC lama ngagai paip HDPE ti lebih bekualiti di Sri Aman.

“Projek nukar paip AC ngagai HDPE ba Renggat Keterubah deka dipejalaika lebih agi di kandang Jalan Resak, Taman Bayu, Jalan RTM Lama enggau beberapa kandang endur bukai di Sri Aman,” ku iya.

Kediatu, ku iya, piak sida benung nganti proses tinda ti begunaka timpuh pengelama dua bulan.

Pengudah tinda nya diberi ngagai kompeni ti dipilih, nya baru projek nuka paip ulih dipejalaika, ku iya.

Sama bisi ba pengawa nemuai nya,Jurutera Bahagian JKR Sri Aman Cassidy Morris enggau sapit iya Noor Ismail Razali, Sapit Chairman Majlis Daerah Sri Aman Kanselor Sawing Sumar, pengereja pengawa JKR Sri Aman enggau ketuai raban bansa.

Advertisement