KOTA SAMARAHAN: Kemari Perintah menua Jepun mujur nyain Sempekat Pemereti Ati (MoU) enggau UNIMAS nengah ‘Institute of Social Informatics and Techology Innovations’ tauka ISITI), meri geran urung USD52,480 (RM168,200) ke nyadi geran ke-5, pengudah ngaga tiga buah projek kuasa solar di Long Lamai, Ba’Kelalan enggau Larapan, ke meri kuasa ngagai palan internet komuniti.
Sapit Mandal Chanselor (Pekara nembiak enggau Alumni) Prof Mohd Fadzil Abdul Rahman madah, kaul entara Jepun enggau UNIMAS, ukai semina nengah universiti tauka industri di Jepun enggau UNIMAS, tang mega enggau Perintah Jepun endang tegap ari kelia.
“Aku berasai temegah ati laban sukung ari Perintah Jepun enda kala puntan, terus diatur nengah chara meri geran ungkup ‘Human Security Projects’ nyadi pemungkal projek menua.
“Tulung sereta bantu tu deka dikena ngaga kuasa solar di Long Puah, di Ulu Tinjar, Sarawak,” ku Fadzil lalu nandu, Perintah Jepun terus nyukung ngemanahka agi kualiti pengelantang pendiau komuniti orang asal di menua tu.
Ba projek bukai ke bedau lama udah dipejalaika, ISITI baru udah nembuka sebengkah projek karan mikrohidro ungkup genturung pendiau Penan di Long Lamai ke nyendiaka elekterik ungkup 50 pintu ruang bilik dia.
Penumbuh ISITI bepun ari pemujur ngaga e-Bario, iya nya projek ICT komuniti ti ditengkebang tukang pansik UNIMAS ke datai ari mayuh bengkah disiplin.
e-Bario udah mandangka chara inovatif nyendiaka ICT ke komuniti di menua ulu di Malaysia, lalu dikelala di renggat antarabansa. Ba renggat nasional, e-Bario digaga di menua ulu di Sabah enggau Sarawak.
Ketegal nya, ISITI milih Long Puah laban iya sebengkah sitak menua di ulu sereta jauh ari grid kuasa. Long Puah ba penuduk niti Sungai Tinjar di Ulu Tinjar. Pengangkut ke dikena kia, begunaka kerita 4X4, 5 jam nengah jalai luri batang ari Miri ngagai Long Aton, lalu ari Long Aton, ngena perau sejam nuju Long Puah.
Long Puah ngembuan urung 250 tubuh, lalu mayuh ari sida tu bansa Penan ke gawa betanam betupi. Di Long Puah semina bisi sebuah aja rumah panjai enggau sebuah gerija.
“Laban Long Puah jauh di menua ulu, sida iya nadai karan ari grid, semina mimit aja ruang bilik ke bisi jenerator ke jarang dikena laban rega diesel mar,” ku iya.
Nya alai projek kuasa elektrik tu mungkur masang sistem api rumah ngena solar.
“The Japanese Grassroots Grant Assistance for Human Security Project’ meri urung RM168,200 ngagai ISITI, lalu nengah bantu nya ti diberi Perintah Jepun, semua 27 ruang bilik di rumah panjai nya enggau gerija deka bisi karan.
Kelimpah ari nyendiaka elekterik, nengah projek nya mega, sistem kuasa ulih dikemanah ngena konsep ngemanahka rampa menua sereta ngemerakna pengadung, deka ngurangka angin kamah tauka berachun baka CO2 (carbon dioxide), CH4 (methane) enggau N2O (Nitrous Oxide) ngagai rampa menua.
“Kelimpah ari nya, ngena sitem solar bepalan di rumah deka mantu ngajar komuniti di sitak menua nya chara nguna kuasa karan di menua pesisir tauka ulu,” ku iya.
Sebedau nya, Kepala Opis Konsul Jepun di Kota Kinabalu, Hirofumi Morikawa madah Perintah Jepun mutus meri geran tu ari penemu iya nya perengka guna deka mantu ngemanahka agi pengelantang pendiau rayat di menua pesisir, nya kebuah bantu RM168,200 diberi ngagai ISITI (UNIMAS).
“Aku beterima kasih ngagai UNIMAS ke nyendiaka penyikap pengelantang pendiau rayat di menua pesisir di Sarawak. Tanda terima kasih kelai projek UNIMAS, datai ke diatu, Perintah Jepun bisi udah meri bantu ngaga projek ngena kuasa solar di Long Lamai, Ba’kelalan di Sarawak,” ku iya.
Hirofumi madah naka kediatu, Perintah Jepun udah mantu RM2.5 juta ngaga 13 projek di Sarawak.
“Perintah Jepun deka terus mantu sida ke tasah tauka tusah ngambika sida iya mega deka ngasaika pengelantang pendiau datai ke jemah ila,” ku iya.
Direktor ISITI UNIMAS, Prof Mdya Dr Alvin Yeo Wee madah, Projek Kuasa Solar di Long Puah deka digaga dalam timpuh ke semak tu lalu disadang deka tembu dalam kandang setaun.
Sebedau nya, Yeo meri penerang ngagai pemesai Opis Konsul Jepun bekaul enggau projek ke deka dipejalai di Long Puah.
Sama bisi ngulu atur pengawa nya ensana, Sapit Mandal Chanselor (Pansik enggau Inovasyen) UNIMAS Prof Dr Kopli Bujang, Prof Dr Fasihuddin Badruddin Ahmad enggau Sapit Dean (ngarika Dean, Fakulti Sain Komputer enggau Teknologi Pemadah), Dr Edwin Mit.