SIBU: Orang ti beempu palan pemerindang tauka pub enggau karaoke ba mengeri tu bela sebana ketegal dagang sida bisi kusut sekumbang palan alai bejudi tauka ‘monkey’ bisi dibuka nengah chara belalai.
Seiku ari sida ke semina dikelala enggau nama Man madah, pengawa bejudi nya ukai semina ngenataika penusah ba pekara belanja orang ke bemain aja tang sida ke beempu palan pemerindang bela bisi ngasaika ubah ari pekara nya.
Ku iya, sebedau tu palan pemerindang sida suah ditiki lebih agi maya ujung bulan.
“Tang kenyau bisi judi ‘monkey’, dagang kami bisi kusut mimit.
“Kebuah pia laban sida rindu agi bemain judi ‘monkey’ tauka nyau ambis duit ketegal ngereja pengawa salah nya,” pia ku iya madah ngagai pengarang berita, kemari.
Pekara tu ku iya ukai semina diasai ke iya aja tang semua sida ke beempu palan pemerindang bela sebana ketegal pekara nya.
Man mega madah kala meda seiku orang ke suah ngelawa palan pemerindang iya suba enda malu minjau duit ari seiku agi bakih ketegal deka bejudi taja maya nya pun bulan.
“Aku suah ninga bisi ruang bilik charut ketegal laki gila bejudi nyentuk sida menyanak suntuk belanja.
“Ukai ngering pengawa niki palan pemerindang ati manah tang enda baka gian bejudi ninting hari laban orang enda ninting hari niki palan pemerindang ati tang belebuh baka maya ujung bulan tauka bisi awak lepa ketegal deka ngelantang ati,” ku iya.
Taja pan baka nya iya muji pengawa raban penerit adat baka polis laban chakah bejalaika pengawa ngemunaska judi ‘monkey’ ba sebelah mengeri Sibu tu.
Berindik ari nya Man mega ngarapka sida ti bejudi enggau orang ti muka palan bejudi nya ulih ditinggang ukum ti berat nangi ke sida ngereja penyalah nya baru.
Ba pekara ti bekaul, kena Hari Dua tu tadi mega, Ketuai Polis Sibu ACP Mohd Kamal Kordi madahka iya pechaya nyangka lebih kurang 50 iti palan bejudi ‘monkey’ agi bisi dibuka ba sebelah mengeri Sibu.
Ketegal nya, raban polis ku iya deka chakah nyidi palan nya nengah Ops Dadu ti diatur ari baruh Indu Opis Polis Bukit Aman.