Anda di sini

Besaup nagang penyalah makai suap

Advertisement

MENANG: Baki (kiba) nerima trofi ari Shibli pengudah teulihka lumur satu ba pekit nimbak ‘Center Fire’ individu.

Media, opis tauka ejensi ti bekaul patut besaup ngerembaika penerang pasal ulah nya

KUCHING: Kaunsil Penagang Pengawa Makai Suap Malaysia (SPRM) Sarawak, ngelaluka media, sebarang opis tauka ejensi ngerembaika penerang pasal penyalah pengawa nyuap tauka makai suap ngagai komuniti.

Ku Direktor SPRM, Datuk Bahri Mohamad Zin madah, penerang dikerembai nengah macham atur program ti dipejalaika SPRM begulai enggau opis tauka ejensi sereta piak media, kelimpah dikena ngedutka kaul.

“Tiap taun kami ngatur Pekit Nimbak ‘Jemputan’ SPRM Sarawak dikena ngenegapka kaul SPRM nengeri enggau opis tauka ejensi sereta piak media, ti mega ulih ngemuntangka (SPRM) ngerembaika penerang ba pengawa nagang penyalah makai suap ngagai raban bansa.

“Ari tu SPRM Sarawak ulih chakah bejalaika pengawa munaska penyalah bekaul enggau suap.

“Kelimpah ari program nimbak tu mega, kitai ulih nambahka pengelandik ngena senyata api,” ku Bahri dalam jaku iya ti dibacha Penulung Direktor SPRM Sarawak, Wan Mohamad Wan Drahman ba pengerami bejadika Pekit Nimbak ‘Jemputan’ SPRM Sarawak 2014 ti diatur ba Lapang Sasar IPK, Sarawak ditu kemari.

Taun tu, SPRM Sarawak mekuh ngagai prinsip ngerayatka SPRM iya nya semak enggau ‘stakeholder’ ngambika ulih meri penerang pasal chara nagang penyalah makai suap.

Be pekit nimbak nya kemari dipasuk sekeda ejensi tauka opis perintah sereta piak media ti nyengkaum Tabung Baitulmal Sarawak (TBS), Indu Opis Polis Pelilih Mit (IPK) Kuching, Opis Menteri Pengawa Dagang, Koperasi enggau Pekara Bebelika Barang (KPDNKK); Kaunsil Bandaraya Kuching Selatan (MBKS); Radio Televisyen Malaysia (RTM); Opis Tanah enggau Survei (L&S); Utusan Borneo, See Hua Daily enggau ke bukai.

Ba pengerami nya kemari bisi dua pekit iya nya ‘Center Fire’ Individu/beraban enggau ‘Falling Plate’ beraban, lalu tiap pemenang mai pulai trofi.

Pemenang ba pekit nimbak ‘Centre Fire’ Individu lumur satu iya nya Awg Baki Awg Bakeri (L&S), Saiful Sabri ari RTM (kedua) enggau DSP Endut Mehad (PGA) teulihka lumur tiga.

Ba pekit ‘Center Fire’ beraban iya nya Awg Baki & DSP Endut teulihka lumur satu lalu ditangkanka KPDNKK ti diarika Mohd Fikri Lai Abdullah & Mohammad Nik Fauzi Suhaili, lalu lumur tiga IPS iya nya ASP Taruna Madran & Supt Fauzilan Abd Aziz.

Pekit nimbak ‘Falling Plate’ beraban iya nya KPDNKK teulihka lumur satu lalu ditangkanka IPD enggau MBKS ti bulih lumur dua enggau tiga.

“Kami (SPRM Sarawak) beterima kasih ngagai ejensi tauka opis ti nyereta Program Pekit Nimbak ‘Jemputan’ SPRM 2014.

“Kami mega beterima kasih ngagai raban media ti selalu nyukung dalam aktiviti ti dipejalaika SPRM Sarawak. Tanggungpengawa media ti ngerembaika penerang enggau jampat sereta betul, amat ngemegahka kami,” ku iya.

Bisi datai ba pengerami nya kemari Menijar Besar Tabung Baitulmal Sarawak (TBS) Datu Abang Mohd Shibli Abang Mohd Nailie enggau ke bukai.

Advertisement