SRI AMAN: Bisi 65 iku kaban Polis Diraja Malaysia (PDRM) ari Indu Opis Polis Pelilih (IPD) Sri Aman nerima setipikit tanda basa ba Pengerami Baris Hari Polis ke-207 ba Padang Kawad IPD Sri Aman, ditu, apin lama ke udah.
Ari penyampau nya, lima iku penerima nya nyengkaum pemesai kanan polis mayuh pangkat, dua iku pengari mensia mayuh, enam iku Inspektor Time Base lalu ke bukai raban polis ari mayuh macham unit.
Dulu agi ari nya, pengerami baris, nyuaka setipikit tanda basa sereta ngelekatka pangkat ngagai pemesai ke ditikika pangkat udah dikemujurka Sapit Supritenden Polis Pelilih Sri Aman, DSP Mat Jusoh Mohamad.
Jusoh maya bejaku ngarika Kepala Polis Menua Malaysia (KPN) ngarapka bala kaban pengelikun ba menua tu bejalaika tanggungpengawa sida enggau chakah sereta dedikasyen.
Ku iya, tanggungpengawa nyadi raban nyaga pengelikun ukai pengawa ke muntang tang betapi enggau mayuh penguji.
“Gawa nyadi kaban penyaga pengelikun menua, kitai patut bejalaika tanggungpengawa enggau manah sereta nyaga pengelikun menua enggau komuniti bepelasarka ati ti angkun,” ku iya.
Sama bisi datai ba program nya, Direktor Sepital Sri Aman, Dr. Hayati Ja’aafar, Penulung Pemesai Opis Pelajar Pelilih Sri Aman, Mohd Yusoff Lugom, Pengerusi PERKEP, Rohana Isnawie sereta kebukai.