KUCHING: Dalam konteks menua Malaysia, pekara bekait enggau pemansang pengawa dagang, kelebih agi ba komuniti Bumiputera diberi pemerat belabuh enggau Atur Ekonomi Baru (Dasar Ekonomi Baru) ti diberi kelala dalam taun 1971.
Menteri Muda di Opis Kepala Menteri (Pemansang Pengawa Dagang Bumiputera) Datuk Naroden Majais madah, nengah atur nya, pemansang pengawa dagang ba komuniti Bumiputera digaga nyadi agenda ke besai dalam pengawa ngemansangka Komuniti Orang Dagang enggau Pengawa Industri Bumiputera (MPPB) ke diberi kelala nyadi chara nusun baru komuniti sereta beratika Bumiputera chakah dalam pemansang ekonomi menua.
“Berindik ari nya, Pemansang Pengawa Dagang kelebih agi orang dagang Bumiputera dikemeratka, sereta dibagi ngagai empat tagit, iya nya nembiak sekula, nembiak universiti, nembiak enggau indu,” ku Naroden.
Setipak enggau peneka perintah beratika komuniti Malaysia ulih besemekih di renggat ke tinggi agi sereta ngembuan orang dagang ke ulih nyukung ekonomi menua ba renggat ke tinggi, berindik ari nya, Kolej Komuniti (KK) mega matih pengawa dagang nyadi siti pengawa ke dipilih lalu matih penemu bekait enggau pengawa dagang ba komuniti menua nya.
“Belandikka pemansang teknologi enggau gaya pendiau ke dinamik kemaya hari tu, kitai patut landik ngerebut peluang enggai tiap perengka guna ke bisi disedia ulih Perintah. Enti kitai deka terus nyadi relevan, kitai patut nyendiaka diri enggau penemu sereta pengelandik ke baru,” ku iya.
Iya madahka munyi nya nengah teks jaku iya ti dibacha Kaban Kaunsil Nengeri (ADUN) Demak Laut, Dr Hadzland Hipni di atur pengawa Nutup Program ‘Fiesta Keusahawanan Kolej Komuniti Kuching 2014’ di kolej nya kemari.
Iya nandu baru, kena beratika pemujur ‘Program Transformesyen Ekonomi’ (PTE) ngaga menua tu nyadi sebuah menua bepemisi tinggi manggai 2020, pengawa KK ngelatih bala orang dagang mujur di menua Sarawak setipak enggau perambu SCORE, iya nya ngemansangka sitak menua pesisir sereta mantu munaska penyeranta, enggau chara nyendiaka peluang kereja sereta nambah penatai pemisi rayat.
Nya alai, ku iya, Program ‘Fiesta Keusahawanan’ ti diatur ulih Unit Pengawa Dagang Kolej Komuniti ke digaga dalam kandang dua hari setipak enggau peneka kemaya hari tu.
“Program baka tu mai pesan, iya nya, pengawa belajar baka tu ulih digaga kitai, enda ngira ni naka umur kitai. KK ulih digaga nyadi entara ngenataika pesan sereta inisiatif Perintah ngagai rayat nengah program ke digaga KK,” ku iya.
Sama bisi ngulu atur pengawa nya kemari, Direktor Kolej Komuniti Kuching, Saidi Japari, enggau Kepala Bagi Pengelandik enggau Pekara bekait enggau Injineer, Wilson Intai.
Kelimpah ari nya, entara aktiviti ke bisi digaga dalam kandang dua hari program nya, nyengkaum ngaga kus pandak ke bala penyereta ke bisi ngambi kus (baka Kus Nyait Set Apron, Kus Nyait Baju Gaun Peplum, Kus Pemun Sketchup, Kus Pemun Autocad 2D, Kus Pemun Microsoft Word, Kus pemun Microsoft Excel, Kus Pemun Muka Homestay enggau sekeda kus pandak bukai) ke bisi narit urung 428 iku penyereta, pekit Autoshow (kerita enggau mutosikal), muka kedai bejual barang sereta pemakai enggau sekeda aktiviti ke bukai.