KUCHING: Dua bengkah raban ke ngembuan runding ti bebida dalam SUPP ke diulu presiden Tan Sri Peter Chin enggau ketuai pampang Sibu Dato Sri Wong Soon Koh patut neladan SPDP ti udah ngelengka laya lalu begempung manah baru, ku mandal presiden SUPP ke dulu suba Datuk Yong Khoon Seng.
Yong ke kala mangku pengawa nyadi Sapit Menteri Kereja Raya enggau MP Stampin ngasai nadai pekara enda ulih diputar enti kededua piak enggau ati ti lurus deka bebaik ungkup pemaik parti.
“Aku agi ngarap sida ulih ngelengka bida runding lalu bebaik. Bedau laun ungkup sida bebaik manah, tiap penanggul sigi bisi jalai dikena kitai mutar lalu sida patut ngiga jalai nya.
“Engka sida patut neladan SPDP, ti bedau lama tu tadi udah nerima pulai empat ari raban G5 ngagai parti,”ku iya bejaku ngagai pemberita ba sebengkah pengerami ke diatur Wushu Association of Kuching ditu, kemari.
Nyaut sekeda tanya, Yong ngasai raban ketuai SUPP ke udah tuai enggau ke udah alah patut meri awak ngagai raban nembiak nguluka parti.
Ku iya, raban nembiak dalam parti patut diberi awak nguluka SUPP laban enti enda pia pengelandik enggau penau sida deka tebasau aja.
“Aku sigi ngarap raban ketuai ke udah tuai meri awak ngagai nembiak baru, tajapan kurang peneleba, pengelandik sida tau diansah. Beri sida timpuh lima ngagai 10 taun, lalu raban ketuai ke dulu tau meri ajar ngagai sida,”ku iya.
Yong ngasai ketuai SUPP ke diatu kurang pengangkun ke pemaik enggau penegap parti enti dibandingka enggau raban ketuai maya jeman 20 taun suba.
“Aku berani madah penyayau sida ke parti udah majak lenyau,”ku ketuai ke beumur 72 taun nya.